"İlk hissəyə yaxşı başladıq. Normal hücumlar qurub vaxtında qol vurmağı bacardıq.  İkinci hissənin əvvəlində niyə pressinq etdiyimizi anlamadım. Bu səbəbdən də lazımsız qol buraxdıq".

Newsport.az-ın məlumatına görə, bu sözləri "Qarabağ"ın qapıçısı İbrahim Şehiç Avropa Liqasının qrup mərhələsinin dördüncü turunda "Monako" ilə bərabərə qaldıqları matçdan (1:1) sonra deyib.

O bildirib ki, üç xal qazanmalı olduqları oyunda heç nədən iki xal itiriblər:

"Bizim vacib iki oyunumuz qalıb. Biri səfərdə "Anderlext"lə, digəri isə doğma meydanda "Tottenhem"lə. Bu oyunlarda hücumlar edib qələbə qazanmaq lazımdır".

İ.Şehiç "Monako"nun qol vurduğu epizodda oyundan kənar vəziyyətin olmadığını vurğulayıb:

"Epizoda təkrar baxdıq. Orada oyundan kənar vəziyyət yox idi. Bizim müdafiəçilərin həmin epizodda nəyi gözlədiyini başa düşmədim. Nəticədə rəqib bundan istifadə edib qol vurdu”.