Türkiyənin trtspor.com.tr saytı "Qarabağ"ın futbolçusu Ramil Şeydayev haqda yazıb.

Newsport.az xəbər verir ki, portalın  "İndi haradadır?" bölməsində bu dəfə millimizin üzvünə yer verilib. 2016-2018-ci illərdə "Trabzonspor"a məxsus olan və burada cəmi 3 oyun keçirən Ramillə bağlı yazılıb:

"Sankt-Peterburq doğumlu olan Şeydayev peşəkar karyerasına  Rusiyada başlayıb. “Zenit”in ikinci komandasında və "Rubin"də oynayan azərbaycanlı hücumçu 2016-cı ildə hələ 20 yaşında ikəm “Trabzonspor”la müqavilə imzaladı. Burada gözlədiyi şansı tapa bilməyən oyunçu Türkiyə karyerasında cəmi 3 rəsmi oyuna çıxdı. Qarşıdakı illərdə "Jilina" və "Qarabağ"da icarə əsasında oynamış forvard, 2018-ci ildə "Krılya Sovetov"la müqavilə imzalayaraq Rusiyaya qayıtdı.

Rusiyada bir mövsüm də  "Dinamo" (Moskva) klubunda  oynayan Şeydayev 2020-ci ildə "Sabah"a keçərək yenidən Azərbaycan Premyer Liqasında oynamağa başladı. 26 yaşlı hücumçu hazırda ötən yay müqavilə imzaladığı "Qarabağ"da ikinci dönəmini yaşayır" - deyə yazıda bildirilib.