Türkiyənin “Trabzonspor” klubu yarımmüdafiəçisi Fusseni Diabate ilə yollarını ayırıb.

Newsport.az-ın məlumatına görə, Super Liqa təmsilçisi Malidən olan 26 yaşlı futbolçunu Serbiyanın “Partizan” klubuna satıb.

Bu barədə klubun rəsmi saytı məlumat yayıb. Futbolçunun gələcək satışından da 5 faizinin Trabzon klubuna ödəniləcəyi diqqətə çatdırılıb.

Fusseni Diabate 2020-ci ilin sentyabr ayında İngiltərənin “Lester Siti” klubundan “Trabzonspor”a transfer olunmuşdu. Lakin o, bu komandanın heyətində çox oyun şansı qazanmayıb. Cəmi 7 oyuna çıxmış futbolçu bu üzdən “Göztəpə” və “Girəsunspor”a icarəyə verilib. O, ötən mövsüm Girəsun təmsilçisində 6 qol vurub, 3 məhsuldar ötürmə müəllifi olub.

Diabate daha öncə Türkiyədə “Sivasspor” klubunun da formasını geyinib. Onun oynadığı komandalar arasında Fransanın “Amyen” və “Ayaçço” klubları da var.