“Zenit” və “Arsenal”ın sabiq yarımmüdafiəçisi Andrey Arşavin paytaxt əyləncələri ilə ilk dəfə danimarkalı komanda yoldaşı Niklas Bendtner vasitəsilə qarşılaşdığını açıqlayıb. Newsport.az xəbər verir ki, rusiyalı futbolçu 2009-cu ildən 2013-cü ilə qədər London təmsilçisinin formasını geyinib.

Keçmiş yoldaşı barədə danışarkən Arşavin deyib ki, Bendtner Londonun gecə həyatını onunla birlikdə kəşf edən ilk adam idi: “Sonradan məlum oldu ki, o, bir az yüngül xarakterlidir və tez sərxoş olur. Lakin bütövlükdə mehriban, şən və əyləncəni sevən bir insandır”.

Müsahibəni aparan jurnalist ilk çıxışın həqiqətən onunla olub-olmadığını dəqiqləşdirəndə Arşavin təsdiq cavabı verib. Seçimin səbəbini isə belə izah edib: “Birincisi, soyunub-geyinmə otağında yanımda otururdu. İkincisi, yaşca gənc idi. Üstəlik, şəhəri az-çox tanıdığını, hara getməyin yaxşı olacağını bildiyini görürdüm”.

Futbolçu bu fikirləri öz müəllif verilişinin son buraxılışında səsləndirib.