Avropa Liqasının qrup mərhələsində "Qarabağ"ın rəqibi olan "Dnepr" klubunun kapitanı Ruslan Rotan Ukrayna mətbuatına müsahibə verib.

Newsport.az -ın məlumatına görə, 32 yaşlı futbolçu növbəti turlarda qarşılaşacaqları "Qarabağ"la oyunların həlledici olacağını bildirib:

- "Sent-Etyen" - "Dnepr" matçına harada baxdın?

- Komanda ilə Fransaya getməməyi və evdə qalaraq məşq etməyi qərara aldıq. Yəni, matçı evdə televizordan izlədim.

- İndi hər şey "Qarabağ"la oyunlarda həll olunacaq?

- Düşünürəm ki, həm "Qarabağ"la, həm də "Sent-Etyen"lə oyunlar bizim üçün həlledici olacaq.

- "İnter" artıq əlçatmazdır?

- Çox güman ki, bəli. İtaliya təmsilçisi iki turdan sonra maksimum nəticə qazanıb. Yəqin, biz ikinci pillə uğrunda mübarizə aparacağıq.

- Komandanın hücumçularına nə olub? "Dnepr" artıq üç avrokubok oyununda qol vura bilmir...

- Vurulan və buraxılan qollara hər kəs cavabdehdir. Bütün günahı hücumçuların üzərinə atmaq düzgün olmaz. Söz verirəm ki, yaxın gələcəkdə bu uğursuz seriyanı qıracağıq.