Qadın həndbolçulardan ibarət Azərbaycan milli komandası Türkiyənin Konya şəhərində təşkil olunan 5-ci İslam Həmrəyliyi Oyunlarında növbəti qələbəsini qazanıb.

Newsport.az-ın məlumatına görə, yığmamız B qrupundakı sonuncu matçında İran seçməsi ilə qarşılaşıb.

Konya Səlçuklu Bələdiyyəsi Beynəlxalq İdman Zalında keçirilən görüş Azərbaycanın 27:16 hesablı qalibiyyəti ilə başa çatıb.

Bu nəticədən sonra qrup qalibi olan yığma yarımfinala vəsiqə qazanıb.

Milli komanda qrupdakı ilk oyununda Kamerunla görüşməli idi. Lakin rəqib meydana çıxmadığından, Azərbaycan yığmasına texniki qələbə verilmişdi. Yığmamız 2-ci qarşılaşmada isə Əfqanıstana qalib gəlmişdi.