Tokio-2020: Daha 4 dəst medalın sahibi bilindi

Kateqoriya: Digər xəbərlər | Tarix: 26.07.2021 11:07

Tokio-2020-də üzgüçülükdə mübarizə davam edir. Newsport.az xəbər verir ki, bu gün üzgüçülükdə daha 4 dəst medal öz sahiblərini tapıb. Əvvəlcə qadınların batterflay üsulla 100 m məsafəyə üzmə yarışlarında medalçılar müəyyənləşib. Kanada idmançısı Marqaret Maknil qızıl medalın sahibi olub. Çjan Yufey (Çin) gümüş, Emma Makkeon (Avstraliya) isə bürünc medal qazanıb.

Qadınların 400 m məsafəyə sərbəst üsulla üzmə yarışında Ariarne Titmusun (Avstraliya) qələbəsi qeydə alınıb. Rio-2016-nın qalibi Keyti Ledeki (ABŞ) bu səfər ikinciliklə kifayətlənməli olub. Li Bintsze (Çin) isə bürünc medala sahib çıxıb.

Kişilərin qurbağa üsulu ilə 100 m məsafə yarışında sürpriz qeydə alınmayıb. Gözlənildiyi kimi, Böyük Britaniya təmsilçisi Adam Piti çempionluğu bayram edib. Niderlanddan Arno Kamminqa ikinci, Nikolo Martinenqi (İtaliya) isə üçüncü olub.

Kişilərin sərbəst üsulla 4x100 m komanda yarışında zəfər ABŞ komandasının olub. İtaliya gümüş, Avstraliya isə bürünc medal qazanıb.

Paylaş