“Qarabağ”ın yarımmüdafiəçisi Filip Ozobiç Çempionlar Liqasının I təsnifat mərhələsində Albaniyanın “Partizani” klubuna qarşı cavab oyunundan (2:0, ilk oyun – 0:0) sonra jurnalistlərin suallarını cavablandırdı.
 
Newsport.az-ın məlumatına görə, 28 yaşlı xorvatiyalı futbolçu öncə oyunu şərh edib:

- Oyun çətin alındı. "Partizani" bizə çətinliklər yaratdı. Yaxşı rəqiblə qarşılaşırdıq. Taktiki cəhətdən və müdafiədə çox yaxşı oynadılar.

- İlk hissədə qol vura bilməməyinizin səbəbi nə oldu?

-  Əsas odur ki, lazım olan qolları ikinci hissədə vurub, qələbə qazanmağ bacardıq.

- Baş məşqçi Qurban Qurbanov fasilədə hansı tapşırıqları verdi?

- Bildirdi ki, sakit oynamaq lazımdır, hər şey yaxşı olacaq.

- Başla vurduğunuz qol "Qarabağ"ın mərhələ adlamasına kömək oldu.

- Uzun müddət idi başla qol vurmurdum (gülür). Ancaq ən önəmlisi qələbə qazanmaq idi. İndi II təsnifat mərhələsini gözləyirik.

- Növbəti mərhələdəki rəqibiniz "Dandolk" barədə məlumatınız varmı?

- Xeyr. Ancaq öyrənəcəyik. Yaxşı hazırlaşmaq lazımdır.

- "Partizani"nin II mərhələdəki rəqibdən güclü olduğunu düşünənlər var. Siz bu barədə hansı fikirdəsiniz?

- Bunu deyə bilmərəm. Hər mərhələdə çətin rəqib olur. Əsas bu matçlara yaxşı hazırlaşmaq və baxımlı oyun göstərməkdir.

- "Qarabağ"ın Çempionlar Liqasının qrup mərhələsinə düşməsi real görünür?

- İndi bu barədə danışmaq üçün erkəndir. Oyundan-oyuna, mərhələdən-mərhələyə irəliləmək lazımdır. Sonrasını birlikdə görəcəyik.

- "Qəbələ"də olarkən "Dalğa Arena"da "Maribor"a qarşı oynamışdınız. Bu stadion siz üçün necədir?

- Bəli, "Maribor"a qarşı burda oynamışam. Ancaq "Tofiq Bəhramov"da oynamağı sevirəm. Hələ ki, "Dalğa Arena"dayıq. Sonra necə olacaq, bilmirəm. Stadionla bağlı bir problemimiz yoxdur.