Azərbaycanın xarici işlər naziri Ceyhun Bayramov və onu müşayiət edən nümayəndə heyəti İtaliyaya rəsmi səfər çərçivəsində Neapolda UEFA Çempionlar Liqasının əsas mərhələsinin V turunun oyununda “Napoli” – “Qarabağ” qarşılaşmasını izləyib.

Newsport.az xəbər verir ki, bu barədə Azərbaycan XİN-in “X” sosial media hesabında paylaşım edilib:

“Bu, Azərbaycanın Avropa futbolunda güclü mövqeyini və milli çempionlarımızı beynəlxalq arenada dəstəklədiyini nümayiş etdirən qürurverici an olub”.

Bayramov özünün “X” hesabında isə bunları yazıb:

“Rəsmi İtaliya səfərim çərçivəsində “Qarabağ” və “Napoli” arasında keçirilən UEFA Çempionlar Liqası matçına qatıldığım üçün məmnunam.

İlhamverici bir atmosfer və “Qarabağ”ı Avropa səhnəsində Azərbaycanı fəxrlə təmsil etdikləri üçün dəstəkləmək üçün mənalı bir fürsət oldu.

Matçdan sonra “Qarabağ”ın prezidenti Tahir Gözəl ilə birlikdə oyunçularımızla görüşdük və onların Avropanın ən güclü klublarından biri olan “Napoli”yə qarşı göstərdikləri əzmkar performansa görə təşəkkürümüzü bildirdik. Gələcək oyunlarda onlara uğurlar arzuladım”.

“Qarabağ” “Napoli”yə 0:2 hesabıyla uduzub.