"Neftçi"nin baş məşqçisi Yuri Vernidub ölkəsinin "ua.tribuna.com" saytına müsahibə verib.

Newsport.az ukraynalı mütəxəssisin fikirlərini diqqətinizə çatdırır:

​- Gəlin söhbətə "Neftçi" ilə bağladığınız yeni müqavilədən başlayaq. Başqa variantları nəzərdən keçirirdiniz, yoxsa komandada hər şey sizi qane edir?

- "Neftçi"də hər şey məni qane edir. Bu, yaxşı komandadır, şərait də münasibdir. Rəhbərlik yeni müqavilə təklif etdi və mən dərhal buna müsbət cavab verdim. Buna görə də hər şey yaxşıdır.

- Yeni mövsüm üçün hədəflər barədə danışmısınızmı?

- Hədəflər hər zaman ən yüksək olur. Xüsusilə də bu il "Neftçi" 90 illik yubileyini qeyd edir. Buna görə də ən yüksək pilləyə çatmaq istərdik. Amma yubiley olmasa belə, "Neftçi" Azərbaycanın tarixi klubudur, ona görə də qarşıya qoyulan məqsədlər hər zaman çox yüksək səviyyədədir.

- Ötən mövsümü dördüncü yerdə başa vurdunuz. İndi hansı əyarlı medalları hədəfləyirsiniz?

- Ən yüksək əyarlı medalları qazanmaq istəyirik, qalanı isə necə olacaq, görərik. Üstəlik, mən iki dəfə - Belarus və Moldovada çempion olmuşam. Niyə Azərbaycanda da çempion olmayım? Özüm də bunu çox istəyirəm və belə bir hədəfin olmasından məmnunam.

- Konfrans Liqasının təsnifat mərhələsində çıxış edəcəksiniz. Orada nəyə nail olmaq istərdiniz?

- Bəli, çempionatda dördüncü yeri tutmaqla Konfrans Liqasında II təsnifat mərhələsindən mübarizəyə başlamaq hüququ qazandıq. Mən Çempionlar Liqası və Avropa Liqasının qrup mərhələlərində oynamışam, lakin Konfrans Liqasının qrupunda hələ olmamışam. Buna görə də oraya düşməyi çox istəyirəm.

- Azərbaycan futbolu haqqında bizə hansı məlumatları verə bilərsiz?

- Çempionat çox maraqlıdır. Premyer Liqada 12 komanda üç dövrəli sistemlə mübarizə aparır. Püşkatma elə olur ki, üç dövrə ərzində bir komanda ilə iki dəfə evdə, bir dəfə səfərdə və ya əksinə qarşılaşırsan. Ona görə də bu nüanslar maraq doğurur. ​Çempionat gözlənilməzdir. Turnir cədvəlinin aşağı pillələrində qərarlaşan komandalardan nə gözləyəcəyini bilmirsən. Məsələn, "Qarabağ" "Kəpəz" kimi komandalarla xallar itirib. Azərbaycanda çox yaxşı və güclü klublar var - "Neftçi", "Qarabağ", "Sabah", "Zirə", "Sumqayıt", "Araz-Naxçıvan". Artıq ən yüksək yerlər uğrunda mübarizə aparan altı komandanın adını çəkdim. Prinsipcə, çempionat pis deyil. Baxmayaraq ki, indi təlim-məşq toplanışıdır və Ukrayna komandaları yoxlama oyunlarında "Qarabağ" və "Sabah"a qalib gəliblər. Amma toplanış toplanışdır. Heç kim komandaların bu oyunlara necə hazırlaşdığını bilmir. Kimsə ağır yükləmələr altında məşq edir, kimsə isə matçlara ayrıca hazırlaşır. Buna görə də konkret nəsə demək çətindir. ​İnsanlar oyunlara gəlirlər, xüsusən də "Neftçi" "Qarabağ" və ya "Sabah"la oynayanda. Ötən çempionatda "Qarabağ"la evdə iki oyun keçirdik və stadion demək olar ki, dolu idi. "Neftçi", "Qarabağ" və "Sabah"ın azarkeşləri çoxdur.

- Ötən mövsüm Ukrayna futbolunda hakimlik haqqında çox danışılırdı. Azərbaycanda bu sahədə vəziyyət necədir?

- Azərbaycanda hakimlik hər yerdə olduğu kimidir. İnsanlar səhv edirlər, çoxlu narazılıqlar olur. Düşünürəm ki, bu, məşqçinin müzakirə etmək istəmədiyi ən ağrılı mövzulardan biridir. Bu, həmişə olub, var və olacaq, biz nə qədər istəməsək də. ​Hətta Dünya Çempionatı da bunu göstərir. Orada da səhvlər və mübahisəli qərarlar var. Ona görə də hər bir məşqçi hakimin səhv etdiyini, hakim isə öz qərarının düzgün olduğunu iddia edəcək. Ötən çempionatda, xüsusilə "Zirə" ilə oyunda belə bir vəziyyətlə qarşılaşdım. Heç-heçə oynadıq və itirilən o xallar bizə üçüncü yeri tutmağa mane oldu. ​"Turan Tovuz"la eyni xalımız var idi, amma burada əvvəlcə komandanın neçə qələbə qazandığına baxırlar. Görürsünüz, belə hallar da olur. Nə etmək olar, heç nə. Səhvin olduğunu hamı etiraf etsə də, onu geri qaytarmaq olmur. Ona görə də səbirli olmaq və bir-birimizə hörmət etmək lazımdır. Çünki inciklik heç nəyi həll etmir. Əlbəttə, emosiyalar var, amma onları cilovlamağı bacarmaq lazımdır.

- Oyunçularınız və klub nümayəndələri "Neftçi"nin oyununda və nəticələrində irəliləyiş olduğunu qeyd edirlər. Buna necə nail oldunuz?

- İlk növbədə, bura gələndə demişdim ki, futbolçuların səviyyəsi kifayət qədər yaxşıdır. Hamısı texnikalı və sürətlidir. Oyunun üzərində isə bir az işləmək lazım gəldi. Uşaqlar hər şeyi dərhal başa düşdülər və xarakter nümayiş etdirdilər. Hər birinə minnətdaram ki, mənim və məşqçilər korpusumun fəlsəfəsini anladılar. Buna görə də biz bu addımı irəli ata bildik.
​Hazırda komanda yenilənib, ona görə də hər şeyi yenidən başlamaq lazımdır. Heç bir problem görmürəm. Uşaqlar hazırdır - çalışır və dözürlər. Düşünürəm ki, hər şey yaxşı olacaq. Qarşımıza qoyulan tapşırıqları yerinə yetirmək üçün əlimizdən gələni edəcəyik. Bu, bizim üçün tamamilə realdır. ​Xarakter və nizam-intizam əsas şərtdir. Həmçinin futbolçuların nə dediyimizi, meydanda nə görmək istədiyimizi, necə hərəkət etməli olduqlarını, hücum və müdafiədə hansı sistemin tətbiq ediləcəyini anlamaları çox vacibdir. Onlar bütün bunları anlayır və yerinə yetirirlər, nəticə də buna görə var. Əgər bu olmasa, heç vaxt nəticə qazanmaq olmaz. ​Kimsə nəyisə başa düşmürsə, yaxınlaşıb soruşmaqda heç bir problem yoxdur. Biz hər şeyi izah edirik. Uşaqlar bilirlər ki, telefonum istənilən məsələ ilə bağlı 24/7 açıqdır. Əsas odur ki, diqqətli olsunlar və həqiqətən xarakter nümayiş etdirsinlər. Hətta bir şey alınmayanda belə, əsəbləşmək lazım deyil, daha çox çalışmaq lazımdır.

- Yeni mövsüm üçün heyəti gücləndirə bildinizmi və Ukrayna bazarına baxırsınızmı?

- Biz artıq dörd oyunçu ilə heyəti gücləndirmişik. Biri azərbaycanlı futbolçu Rüfət Abbasovdur - 21 yaşlı sol cinah müdafiəçisi. O, artıq Azərbaycanın milli komandasına çağırılıb, "Şamaxı"da oynayıb, özü isə "Neftçi"nin yetirməsidir. ​Həmçinin üç yeeni əcnəbi futbolçumuz var. Endryu Qraviyon - mərkəz müdafiəçisidir, Qvadelupa millisinin oyunçusudur. Onun karyerası kifayət qədər yaxşıdır. Fransada və İtaliyada oynayıb. Görünür ki, oyunçu çox yüksək səviyyəyə malikdir. ​Daha sonra orta xətti gücləndirdik. Portuqaliya çempionatından braziliyalı Qustavo Klisman gəldi. Hücum xəttinə isə Slovakiya millisinin üzvü Lyubomir Tuptu aldıq. O, universal oyunçudur. Sağda, solda, mərkəz hücumunda, "on nömrə" və "səkkiz nömrə" mövqelərində oynaya bilir. Anlayırıq ki, heyəti daha da gücləndirmək lazımdır. Ona görə də bu istiqamətdə işləyirik. Ukraynadan oyunçular dəvət edərdim, lakin transfer etmək istədiyimiz futbolçuların hamısının yaxşı klublarla müqavilələri var. Buna görə də, prinsipcə, danışmağa dəyməz.

- "Şerif"də də çoxlu sayda əcnəbi ilə işləmisiniz. Legionerlərlə ortaq dili necə tapırsınız?

- Əcnəbilərin dairəsi çox genişdir. Amma minnətdaram ki, fransız, portuqal və ispan dillərində danışan iki tərcüməçimiz var. Onlar oyunçularla ünsiyyət qurmaqda mənə kömək edirlər. Həmçinin uşaqların çoxu ingilis dilini yaxşı bilir, ona görə də hər şey qaydasındadır. ​"Şerif"də öyrəndiklərim indi "Neftçi"də mənə çox kömək edir. Heç bir problem görmürəm. Bütün uşaqlar normaldır, qarşılarına qoyduğumuz bütün tapşırıqları yerinə yetirirlər. Ona görə də bu mənada hər şey yaxşıdır. ​Məşqçi hər il inkişaf etməlidir. "Şerif"də işlədiyim vaxtdan beş il keçib. Həmin təcrübədən bəzi şeylər qalıb, amma mən həmişə irəliyə doğru addım atıram, öyrənmək və inkişaf etmək istəyirəm. Bu, hər bir məşqçiyə - həm gənc mütəxəssisə, həm də mənim yaşımda olanlara lazımdır. Əgər dayansan, onda işi bitirib getmək daha yaxşıdır.

- Toplanış və yeni mövsümə hazırlıq necə keçir?

- Bakıda səkkiz gün çalışdıq. Təməl qoyurduq, ona görə də çoxlu qaçış və fiziki işlər gördük. Yalnız sonda öz aramızda ikitərəfli oyun keçirdik. Ayın 29-da Sloveniyaya gəldik və növbəti günlərdə gündə iki dəfə məşq etdik. ​"ÇFR Kluj"la ağır yükləmələr altında oynadıq, amma hər şey yaxşıdır. İlk hissə xoşuma gəldi. İkinci hissə də pis deyildi, lakin səhvlər oldu. Rəqib iki qol vurdu, biz isə bir. Ona görə də məğlub olduq. ​Toplanışlar elə bunun üçündür ki, öyrənək. Təhlil edəcəyik, düzəlişlər aparacağıq və uşaqlara məsləhətlər verəcəyik. İrəliyə doğru hərəkət etmək lazımdır. Əsas odur ki, çempionat və ya Konfrans Liqası başlayanda bu səhvlər təkrarlanmasın.

- Yanvarda 60 yaşınız tamam oldu. Yubileyi necə qeyd etdiniz?

- 60 yaşım olduğunu hiss etmirəm. İndi hər gün öz proqramımla idmanla məşğul oluram. 12 kq arıqlamışam. Özümü çox əla və yaxşı hiss edirəm. Məşqlər zamanı uşaqlarla birgə hərəkət edirəm. ​Bəlkə də həyat artıq öz əlamətlərini göstərir, amma mən onları hiss etmirəm. Özümü çox daha gənc hiss edirəm. Nümunəmlə uşaqlara göstərmək istəyirəm ki, 60 yaşında da idmanla məşğul olmaq və gənclərdən heç də geri qalmayan bir görkəmdə olmaq olar. ​Mənim trenajor zalım, qaçışım var, gündə azı 12 km yol qət edirəm, ona görə də arıqlamışam. Yoxsa artıq özümü bir az baba kimi hiss edirdim.

- Mən heç vaxt Azərbaycanda olmamışam. 2026-cı ildə bura necə bir ölkədir?

- Azərbaycan çox xoşuma gəlir. Azərbaycanlılar çox tərbiyəli, mehriban və qonaqpərvər insanlardır. Onlarla ünsiyyətdə heç bir problem yoxdur. Paytaxt Bakı çox gözəl və sürətlə tikilib abadlaşan şəhərdir. Xəzər dənizinin sahilində yerləşir, ona görə də balıq çeşidi çoxdur. Yeməklər çox dadlıdır. Yerli mətbəx xoşuma gəlir. Yayda istidir, qışda isə Ukraynadakı kimi soyuq deyil. Burada temperaturlar aşağıdır - təxminən +30 - +32 °C, amma dənizə görə rütubət çox yüksəkdir. ​Temperatur +25 - +27 °C çatanda nəfəs almaq bir qədər çətinləşir. Yeganə xilaskar küləkdir. Bakını hətta küləklər şəhəri də adlandırırlar. Bunun sayəsində sərinlik və bir az təravət olur, ona görə də istiyə dözmək daha asandır. ​Azərbaycan haqqında pis bir söz deyə bilmərəm. Üstəlik, azərbaycanlılar Ukraynanı çox dəstəkləyir və kömək edirlər. Bu millət və insanlar xoşuma gəlir. Hər şey superdir.

- "Neftçi"də işlədiyiniz müddətdə başınıza gələn bir əhvalatı bölüşə bilərsinizmi?

- Mən çox sakit və təmkinli insanam. Həyat yoldaşımla şəhərdə gəzəndə insanlar yaxınlaşıb şəkil çəkdirir, "Neftçi" ilə qələbələr arzulayırlar və s. Belə hallar çox olur.
​Xüsusilə də şam və ya nahar etmək üçün yoldaşımla bir yerə girəndə. Restoranlarda çoxlu sayda ofisiant məni tanıyır, hörmətlə yanaşırlar, çox söhbət edirik. Yoxsa hər şey əladır. Hətta bilmirəm sizə nə danışım.

- Adınız tez-tez Ukrayna millisi ilə bağlı hallanır. Nə vaxtsa milli komandada işləmək arzunuz varmı?

- Düşünürəm ki, bu, hər bir məşqçinin arzusu və istəyi olmalıdır. Ümumiyyətlə, milli komandanın baş məşqçisi kimi işləyəndə, bu, özünü göstərmək üçün böyük şansdır. Çox gözəl tapşırıqdır. Amma anlayıram ki, məndən başqa buna layiq olan çoxlu sayda yaxşı mütəxəssislər də var. ​Andrea Maldera ukraynalı deyil, amma öz yerini layiqincə tutur. Arzu edirəm ki, özünü bacardığı qədər yaxşı tərəfdən göstərsin və onun rəhbərliyi altında millimiz ən yüksək nəticələrə nail olsun. Bütün futbolçular onun haqqında çox müsbət danışırlar, buna görə də hər şey yaxşı olacaq.

- "Neftçi"də işləməyə başlayandan Ukrayna Premyer Liqasını izləyirdinizmi?

- Mütləq. Heç bir sürpriz olmadı. "Şaxtyor" haqlı olaraq çempion oldu. Əgər "Polissya" cədvəlin aşağı hissəsindəki komandalarla xal itirməsəydi, üçüncü deyil, ikinci ola bilərdi. LNZ də öz yerinə layiqdir. Turnir boyu komanda ön pillələrdə gedirdi, ona görə də üçüncü olsaydılar, çox təəssüf doğurardı. ​Anlayıram ki, müharibə gedir və Ukraynada futbol hərbi dövrün çətinlikləri ilə üzləşir, amma çempionatın keçirilməsi çox təqdirəlayiqdir. Müharibə tezliklə bitsin, o zaman hər şey daha yaxşı olacaq. Yaxşı komandalarımız var. "Şaxtyor", "Dinamo", LNZ, "Polissya", "Metallist" ən yüksək yerlər uğrunda mübarizə aparacaqlar. Bura "Zarya"nı da əlavə edərdim.

- Hamı sizin mövqeyinizi və işğalın əvvəlində Ukraynaya qayıdıb Silahlı Qüvvələrə qoşulduğunuzu bilir. Lakin "Neftçi"də bir neçə hadisə oldu ki, bu, sizin üzərinizə kölgə saldı. Bu, Kurban Berdiyevlə əl sıxmağınız və klubunuzun Moskva "Lokomotiv"i ilə əməkdaşlığı idi. Bu hadisələri necə keçirdiniz?

- Mən həmişə ukraynalı olmuşam, ukraynalı qalıram və ukraynalı olaraq da qalacağam. Bilirsiniz, bu barədə oxumaq çox narahatlıq verirdi. Xüsusilə də məni tanıyan insanlar yazanda. Bu, onların hüququdur. Hamı ağıllıdır və hər şeyi bilir. Həyatda belə olur - bəzən hansısa səhvlər olur, amma əsas odur ki, onları qəbul edib nəticə çıxarasan. Qalan hər şey isə artıq tarixdir.

- Bəlkə klub rəhbərliyi ilə bu barədə danışmısınız?

- Mənim klubla bu mövzuda dərhal söhbətim oldu. Çünki bu məlumatı hamı kimi mən də xəbərlərdən eşitdim. Bu əməkdaşlıq uşaq akademiyasına aiddir. Bu, mənim gəlişimdən çox əvvəl razılaşdırılıb və mənim işimlə heç bir əlaqəsi yoxdur. Uşaq akademiyası ilə heç bir əlaqəm yoxdur. ​Onların münasibətlərinə təsir edə bilmərəm, amma sizi əmin edə bilərəm ki, mən heç yerə getmirəm və getməyəcəyəm. Azərbaycanda əsas komanda ilə işləyirəm. ​Toplanışdan əvvəl düz 10 gün Ukraynada oldum. Elə Kiyevə gəlmişdim ki, ruslar məni atəşlə "qarşıladılar". İndi yenə atəşə tuturlar. Onlar isə deyirlər ki, hərbi hədəfləri vururlar. Məndə belə bir təəssürat yaranır ki, vəhşi heyvanlar onlardan daha yaxşıdır. ​Onlar insan deyillər. Hətta onları vəhşi heyvan adlandırmağa belə dilim gəlmir. Hələ onları təsvir edə biləcək bir söz mövcud deyil.