"Bolqarıstanla bizi çətin oyun gözləyir. Rəqibin heyətində Modriç, Mandzukiç və Rakitiç kimi futbolçular yoxdur. Ancaq rəqib yaxşı komandadır. Bizdə isə əla futbolçular var və komanda hazırda yaxşı formadadır".

Newsport.az-ın məlumatına görə, bu sözləri Xorvatiya millisinin müdafiəçisi Damaqoy Vida ölkəsinin mətbuatına açıqlamasında deyib.

Təcrübəli futbolçu bolqarların Azərbaycanla oyundakı qələbədən (2:1) sonra onlara da qalib gəlmək istəyəcəyini, lakin komandasının səfərə 3 xal üçün gedəcəyini bildirib: 

"Bolqarıstan yığmasının heyətində ulduz futbolçu olmasa da, gənc oyunçulardan təşkil olunmuş, yaxşı kollektivdir. Düşünürəm ki, onlar Azərbaycanla oyundakı qələbədən sonra bizə də qalib gəlmək istəyəcəklər. Ancaq biz də səfərə 3 xal üçün gedəcəyik. Sofiyadakı stadionda bizi cəhənnəm atmosferi gözlədiyini bilirik. Lakin biz oyunumuzla azarkeşləri susdurmalıyıq. Bu oyuna yaxşı hazırlaşmışıq. Danışmaq əvəzinə işimizi görməliyik".

Qeyd edək ki, oktyabrın 10-da səfərdə Bolqarıstanın qonağı olacaq Xorvatiya millisi 3 gün sonra evdə yığmamızla qarşılaşacaq.