ABŞ Prezidenti Donald Tramp 2026-cı il dünya çempionatı üçün rekord sayda tamaşaçı toplandığını açıqlayıb. Siyasətçinin sözlərinə görə, davam edən turnir artıq həm tamaşaçı sayı, həm də televiziya baxışı üzrə rekordları alt-üst edib.

Newsport.az xəbər verir ki, "USA TODAY" Donald Trampın fikirlərini bu şəkildə sitat gətirib: "Bildiyiniz kimi, Amerika son bir neçə həftədir ki, 2026-cı il dünya çempionatına qürurla ev sahibliyi edir. Və bu turnir əvvəllər heç vaxt olmadığı qədər tamaşaçı sayı və televiziya rekordları qırır. Kimin ağlına gələrdi ki, belə olacaq! Deyirlər ki, bu, bizim ən vacib idman növümüz deyil, amma reallıq göz qabağındadır.

Mən dostum, FİFA prezidenti Canni İnfantinonu təbrik etmək istəyirəm. Onunla işləmək çox xoş idi. O, qeydə alınan daimi rekordlardan çox məmnundur, sanki hər gün Superkubok keçirilir. Bilirəm ki, hamı Los-Ancelesdə Türkiyəyə qarşı oynayacaq ABŞ komandasına uğurlar arzulamaqda mənə qoşulacaq. Onlar əla iş görürlər".

Xatırladaq ki, 2026-cı il dünya çempionatı eyni anda üç ölkədə – ABŞ, Meksika və Kanadada keçirilir.