“Qarabağ”ın kapitanı Maksim Medvedev “Qəbələ” ilə matçdan sonra mətbuat konfransında iştirak edib.
Newsport.az-ın məlumatına görə, Ağdam klubunun futbolçusu jurnalistlərin suallarını cavablandırıb.
“İntensiv oyun oldu. Böyük turnirdə oynamırıq. Bu mənada oyuna köklənmək çətindi. Birinci hissədə bundan əziyyət çəkirdik. Amma ikinci yarıya çıxanda tam başqa futbol oynadıq. Hər şey istədiyimiz kimi alındı.
- Yaxşı köklənsəydiniz bəs neçə qol vurardınız?
- İstər-istəməz böyük komandalara qarşı oynayanda başqa cür hazırlaşırsan. Konsentrasiyanı oyuna yönəldirsən. Yerli çempionat oyununa hansısa futbolçu rahat çıxır, konsentrasiya aşağı olur. Çalışmalıydıq ki, bunu qaldıraq. Hər il bizdə bu cür problem baş verir. Baş məşqçi də demişdi ki, belə problem ola bilər.
- Penalti sizi nə dərəcədə qıcıqlandırdı?
- Oyun gedə-gedə əsəbləşmişdik. Amma sonradan videoya baxdıq və gördük ki, Medina rəqibi tutur, qərar doğru verilib.
- Çempionatımızın səviyyəsizliyi imkan vermədi ki, “Marsel” səddini keçəsiniz?
- İnanmıram, Azərbaycan çempionatı elə səviyyədə olsun ki, “Marsel”lə matça çıxaq və bərabərsəviyyəli futbol oynayaq. “Marsel” başqa səviyyədi. Amma bizim çempionatımızın da səviyyəsi aşağı deyil. Sadəcə daha da çox çalışmaq lazımdı. Güclü legionerlər gəlsə, daha yaxşı rəqabət olar. Bildiyimiz kimi gələn mövsüm komanda sayı artırılacaq. Bəlkə daha maraqlı olacaq. Daha böyük rəqabət olsa, böyük komandalara qarşı inamlı oynaya bilərik.
- 33 yaşın olsa da, hələ də idman formanı yaxşı saxlamısan...
- İnsanın özündən çox şey asılıdı. Gənclikdə çox səhvlərim olub. İndi keçmişə baxanda hərdən gülürəm, peşman oluram. Ki, kaş bunu etməzdim. Peşəkar olmaq yalnız məşq etməklə deyil.
- Rəşad Sadıqovun avrokuboklardakı oyun sayında rekordunu qırdın. Bəs, millidə oyuna sayına və ya heç olmasa 100 oyun sayına çatan ikinci futbolçu ola biləcəksən?
- Millidə çox oyun oynamaq çətindi. İnanmıram ki, Rəşadın rekorduna çatım. Çünki 1 ildən sonra milli ilə vidalaşmaq qərar verəcəm. 34-35 yaşında milli karyerasını davam etdirən az futbolçu var. Gərək 3 il də oynayım ki, buna çatım. Amma zaman göstərəcək. Əsas sağlamlıqdı ki, çalışım 100-ə çatım.
- "Qarabağ"da uğurlar qazanmısan. Bundan sonra hədəflərin nədi?
- Konfrans Liqasının qrupundan çıxmışıq. Amma istəyərdim ki, bu Avroliqada və Çempionlar Liqasında olsun. İstənilən halda nə qədər uğurlar olsa da, hədəflər bitmir.
