Mini futbol üzrə Azərbaycan çempionatının qalibi Çempionlar Liqasında iştirak edəcək.

Newsport.az saytının məlumatına görə, bu barədə Mini Futbol Liqasının püşkatma mərasimində çıxış edən Azərbaycan Mini Futbol Federasiyasının (AMFF) sədr müavini Taleh Nəsibov bildirib.

O, federasiyanın yeni təsis olunduğunu söyləyib: “Üzərindən 3 il vaxt keçsə də, pandemiya dönəmi yaşadıq. Bu müddətdə bütün yarışlar dayandırılmışdı. Yumşalmalardan sonra çempionatın bərpasına start vermək qərarına gəldik. Bu turnirin qalibi Çempionlar Liqasına yollanacaq. Bütün iştirakçılara uğurlar arzulayıram. Federasiya olaraq bütün dəstəyi verəcəyik. Gənclər və idman naziri Fərid Qayıbov da bizə dəstək verəcəyini bildirib. Bunun sayəsində daha yüksək nailiyyətlər əldə edəcəyimizə inanıram. İstərdim ki, bu yarış daha maraqlı və baxımlı alınsın”.

Daha sonra söz alan baş katib Orxan Hüseynov və liqanın meneceri Vüsal Cəmilli çıxış edərək qonaqları salamlayıblar, AMF-in fəaliyyəti və Alfa Fire Liqa haqqında məlumat veriblər. Öncəki çrmpionatlardan video çarxlar ekrana gətirildikdən sonra tədbirin aparıcısı İsmayıl Abdullayev qrupları müəyyən etmək üçün tədbirə xüsusi qonaq qismində dəvət olunan AFFA nümayəndələrini milli komandanın sabiq üzvləri - Fərrux İsmayılov və Cahangir Həsənzadəni səhnəyə dəvət edib. Mini Futbol Liqasında yeni mövsümün püşkü atılıb. Püşkatma mərasimində 12 komanda iştirak edib. Komandalar A və B olmaqla iki qrupa bölünüb və hər qrupda 6 kollektiv yer alıb.

A qrupu

“Zəfər”
“Qərbi Azərbaycan”
“Vur komandir”
“Bizon”
“Badamdar”
“Muğan Bank”

B qrupu

“Galaxy”
“KATV1”
“Peçat Dönər”
“Birbaşa”
“Lökbatan Yunayted”
“Sirena Motors”

Qaydalara əsasən ilk 4 yeri tutan komandalar 1/4 finala vəsiqə qazanacaq.

A1-B4       A3-B2
A4-B1       A2-B3 

Liqanın startı 12 mart tarixində olacaq. Oyunlar həftənin şənbə günləri Azfar Böyükşor stadionunda keçiriləcək. Final oyunu mayın 28-də oynanılacaq.