İtaliya mətbuatı Avropa Liqasının pley-off mərhələsinin püşkatma mərasiminin nəticələri ilə bağlı yazı hazırlayıb.

Newsport.az xəbər verir ki, bu ölkənin "tag24.it" portalı "Qarabağ" və "Braqa" klubları arasında keçiriləcək matça da yer verib: 

"Ən maraqlı matçlar sırasına şübhəsiz ki, "Braqa" - "Qarabağ" oyunu da daxildir. Komandaları bir-birindən 6000 km-dən çox məsafə ayırır. Bu, hər iki klubun azarkeşləri üçün əsl odissey olacağını vəd edir. Digər tərəfdən, biz bilirik ki, futbol həvəsinin sərhədi yoxdur və belə uzun bir səyahət çətin ki, azarkeşləri qorxutsun. 

"Qarabağ” uzun illərdir Azərbaycan çempionatında dominantlıq edir. Bakıdan Braqaya səyahət həqiqətən də nəfəs kəsicidir: təkcə 6000 km-dən çox deyil, həm də ən yaxşı halda 11 saatlıq uçuş. Avtomobillə səyahət etməyə qərar verən cəsur insanlar üçün vəziyyət daha dramatikləşir. Bu halda səfər ən azı 72 saat davam edir, marşrut bir neçə ölkədən keçir. "Braqa" - "Qarabağ" matçı komandalar arasında ilk oyun olacaq".