"Qarabağ" Azərbaycan kubokunun yarımfinal mərhələsində iki oyunun nəticəsinə görə "Qəbələ" ilə dueldə mübarizəni dayandırıb.

 

Newsport.az-ın məlumatına görə, oyundan sonra Ağdam klubunun yarımmüdafiəçisi Riçard Almeyda jurnalistlərin suallarını cavablandırıb. 29 yaşlı futbolçu öncə oyunla bağlı danışıb:

 

- Bu gün çox gözəl oyun nümayiş etdirdik. Kollektiv olaraq baş məşqçinin bütün istədiklərini yerinə yetirməyə çalışdıq. Fikrimcə, bu, bizdə alındı. Ancaq futboldur, bir səhv və finala adlaya bilmədik. “Qəbələ”ni təbrik edirik. 3 gün sonra “Səbail”lə vacib oyunumuz var. Həmin qarşılaşmaya köklənməliyik.

 

- Həmin matç yarımfinaldan daha vacibdir?

- Xeyr, bütün oyunlar vacibdir. Təəssüf ki, bir səhvə görə finala çıxa bilmədik. Qarşılaşmalara ciddi yanaşırıq.

 

- Komandada məyusluq görünmür. Naxçıvana getməyə həvəsiniz yoxdur?

- Kim finalda oynamaq istəməz?

 

- Hər iki qoldan sonra “Qarabağ”da boşluqlar yarandı. Bu, rahatlaşmağınıza görə idi?

- “Qəbələ” ümidlərini əks-hücumlara bağlamışdı. Bizim bir neçə qol şansımız oldu. 3-4-cü qolları da vura bilərdik.

 

- Çempionluq titul baxımından önəmlidir, yoxsa rəqibin bu yarışda “Neftçi” olması siiz motivasiya edir?

- Futbolçu hər zaman titul qazanmaq istəyir. “Neftçi” və ya digər rəqiblərin olması fərq etmir. Titul daha önəmlidir.

 

- Azarkeşlər arasında mübahisələr komandalar arasında yoxdur?

- Onların arasındakı mübahisələr bəzən söyüşə qədər davam edir. Futboçular meydanda bir-birinə hörmət etməlidir. Tək “Neftçi” deyil, “Qəbələ” də bizim rəqibimiz sayılır.

 

- Miçellə Stankoviçin münaqişəsində nə baş vermişdi? Elə sən də Stankoviçlə mübahisə etdin.

- Miçel bir az çılğındır. Stankoviç də təxribata çəkməyi xoşlayır. Futbolda uduzmağı da bacarmaq lazımdır.