Newsport.az saytının məlumatına görə, Rəfiyev öncə oyunla bağlı danışıb:
- Komanda yaxşı oynadı, amma məqamlar var ki, onlardan narazı qalmışıq. Xeyli qol epizodlarını qaçırdıq. Bu, tək bu oyuna şamil edilmir, bütün matçlar üçündü.
- Komanda 3-cü pilləyə yüksəldi. Bu, sizi qane edir?
- Hazırda 3-cü yerdə getməyimiz pis deyil. Bildiyiniz kimi, büdcəmiz böyük deyil, məhduddur. Ancaq çempionatın cəmi 6 turu oynanılıb. Heç 1/4 hissəsi keçməyib. Hələ nəsə demək üçün tezdir. Ən önəmli olan mövsümün sonuudur.
- "Sumqayıt" avrokuboklara yollanmağı qarşısına hədəf qoyub. Komandada belə potensial görürsünüz?
- Hər oyuna qələbə niyyəti ilə çıxırıq. Məqsədimiz maksimum xal toplamaqdır. Əsas odur ki, futbolçular zədədən uzaq olsunlar. Çünki heyətimiz o qədər də zəngin deyil. Ona görə də bizim üçün çətindir.
- Atilla Yıldırımın xəstəliyi sizə məlumdur?
- Hansı xəstəliyi?
- Onlarla qol epizodu yaranır, amma yararlana bilmir.
- Bunu öncə də qeyd etdim ki, oyunumuzdan razıyam, sadəcə hər matçda çoxlu şansları qaçırırıq. Bundan narazıyıq. Tək Atilla deyil, bir neçə futbolçumuza da şamil edilməlidir.
- Atilla Yıldırımla Aleksey İsayevin Azərbaycan millisində çıxış etməsi mümkündür? Onlar milliyə faydalı ola bilərlər?
- Əlbəttə, biz istəyirik ki, "Sumqayıt"dan milliyə nə qədər çox oyunçu getsə, buna sevinərik. Bu, millinin baş məşqçisinin qərarı olacaq.
- Stadionla bağlı son durum necədir? Yeni tribuna salınacaq?
- Yeni tribunanın tikintisiylə bağlı danışıqlar son danışıqlar gedir. Hava şəraiti normal olsa, noyabr ayının ortalarından etibarən oyunlarımızı Sumqayıtda keçirəcəyik.