“Çox gərgin oyun keçdi və bunun şahidi oldunuz. Futbolçularıma təşəkkür edirəm”.

Newsport.az saytının məlumatına görə, bu sözləri “Sumqayıt”ın baş məşqçisi Nazim Süleymanov deyib. 

“Kimyaçılar” Azərbaycan Premyer Liqasının VI turunda öz meydanında “Zirə”dən üstün olub.

Oyundan sonra baş tutan mətbuat konfransında iştirak edən gənc çalışdırıcı fikirllərini bildirib: “Yaxşı oynadıq. Futbolun meyvəsi qoldursa, təkcə bu çatmırdı. Qol epizodları yaratdıq, bəzilərindən istifadə edə bilmədik. Qələbə qazanmaq hər zaman xoşdur”.

- Özünüz də qol epizodlarından yararlana bilmədiyinizi qeyd etdiniz.  Hücumçu axtarışını davam etdirirsiniz?

- Bu barədə düşünmürük. Əlimizin altında olan futbolçulardan istifadə etməyə və irəliyə getməyə çalışacağıq.

- Son nöqtənin qoyula bilməməsinə səbəb nədir?

- Minimal hesabla irəlidə olmaq çox pisdir.  Çünki rəqib hesabı bərabərləşdirə bilər. Bunu tələskənliklə əlaqələndirərdim. Futbolçularım meydanda özlərini daha rahat hiss etməlidirlər.

- Əfran İsmayılov 82-ci dəqiqədə əvəzlənməsini istədi. Gərgin oyunda təcrübəli futbolçunun əvəzlənməsini istəməsi doğru haldır?

- Burada amillər var. Məsələn, süni meydançalar futbolçuya pis təsir edir.  Əfranı başa düşmək lazımdır. Bundan başqa, əlində zədə var idi.  Ona görə də onu əvəzləmək məcburiyyətində qaldıq.