“Qarabağ”a transfer olunacağı gözlənilən Xama Billiat Cənubi Afrikanın “Mamelodi” komandasını heyətində son oyununu keçirib.
Newsport.az-ın məlumatına görə, zimbabveli hücumçu Afrika Çempionlar Liqasının yarımfinal mərhələsinin “Horoya” ilə cavab görüşündə iştirak edib. İki oyunun nəticəsinə əsasən, Billiatın komandası mübarizəni dayandırıb. 2:2 hesabı ilə yekunlaşan təkrar matçda 27 yaşlı futbolçu bir qol vura bilib. BBC-nin saytı yazır ki, bu, Billiatın “Mamelodi”də son matçı olub. “O, karyerasını bundan sonra böyük ehtimalla Azərbaycanda davam etdirəcək” – deyə bildirilib. Klub adı çəkilməsə də, bunun “Qarabağ” olduğu şübhə doğurmur.
Qeyd edək ki, Ağdam klubunun baş məşqçisi Qurban Qurbanov bugünlərdə Billiatla danışıqlar apardıqlarını təsdiqləmişdi.
Əlavə edək ki, 2013-cü ildən "Mamelodi Sandaunz"un formasını geyinən 27 yaşlı hücumçu Zimbabve millisinin üzvüdür.