"Azərbaycan turu”na daha bir mərhələnin artırılması müzakirə olunur" Sahib Ələkbərov

Ümummilli Lider Heydər Əliyevin 94-cü ildönümünə həsr olunmuş “Tour d’Azerbaidjan-2017” beynəlxalq velosiped turu başa çatıb.

Newsport.az-ın məlumatına görəyarışından sonra Azərbaycan Velosiped İdmanı Federasiyasının vitse-prezidenti, Avropa Velosipedçilər Birliyinin Rəhbər Komitəsinin üzvü Sahib Ələkbərov, Avropa Velosipedçilər Birliyinin vitse-prezidenti Aleksandr Qusyatnikov və turun texniki direktoru, Avropa Velosipedçilər Birliyinin fəxri baş katibi Roland Hofer jurnalistlərin suallarını cavablandırıblar.

Sahib Ələkbərov: “Qarşıya qoyulan vəzifələrin öhdəsindən gələ bildik. Çox yaxşı yarış oldu. İlk dəfə “Azərbaycan turu” ilə bu qədər dəyişkən hava ilə üzləşdik. Yağış da yağdı, dolu da. Amma təbiət hadisəsi tura rəng qatdı. Əsas odur ki, komandalar həvəslə bu yarışda çıxış etdi. Gördüyünüz kimi, mərhələlər üzrə fərqli qaliblərimiz oldu. Yarışın texniki direktoru Roland Hoferə, Avropa Velosipedçilər Birliyinin vitse-prezidenti Aleksandr Qusyatnikova, polisimizə, yerli icra hakimiyyətlərinə və jurnalistlərə minnətdarlığımı bildirirəm. Ağsu mərhələsi ilk dəfə tura salınmışdı. “Süpürgə” maşınından soruşdum ki, dolaylarda neçə velosipedçiyə yardım etmisən? O da yalnız birinə kömək etdiyini söylədi. Çox gözəl mənzərələr “Eurosport” tərəfindən nümayiş etdirildi. Düşünürəm ki, dolaylar velosipedçilərin də xoşuna gəldi. Azərbaycanı dünyaya tanıtmaq mənasında daha bir addım atdıq. “Azərbaycan turu”na daha bir mərhələnin artırılması müzakirə olunur. İdmançılar Pirquludan qayıdandan sonra dincəlməyə getdi. Biz isə qonaqlarla Xızı dağlarına yollandıq. Həmin marşrut qonaqlarımızın çox xoşuna gəldi. Bu yollar yarış üçün çox əlverişlidir. Kəskin enişlər və yoxuşlar, sərt döngələr var. Gələn il çox maraqlı yarış baş tutacağını düşünürəm. Bu nəticəni gözləyirdim. Komandamız gəncləşib və bu üzdən müəyyən çətinliklərlə üzləşmişik. Ancaq şadam ki, Kiril Pozdnyakov ümidlərimizi doğrultdu. Bu, hələ başlanğıcdır. Bu heyətlə daha böyük uğurlara imza atacağıq. Buna qədər iki dəfə komanda şəklində qalib gəlmişdik. Mənim üçün hər bir uğur şirindir. 6 pro-kontinental komandanın iştirak etdiyi yarışda, təcrübəli rəqiblərlə mübarizədə Kirilin I yeri tutması böyük uğurdur. Kiril məsuliyyətini hiss edən idmançıdır. Ona böyük ümidlərim var. Ancaq velosiped idmanı yalnız fərdi mübarizədən ibarət deyil. O bu uğura təkcə özü yox, komanda üzvlərinin yardımı nəticəsində nail olub. Başqa beynəlxalq yarışlar da keçirməliyik. Amma ilk növbədə idmançılarımızı yetişdirməli və bazamızı inkişaf etdirməliyik. Bunun üçün müəyyən maliyyə vəsaiti tələb olunur. Dövlət dəstəyi çox böyükdür. Belə dəstək olmasaydı, bu miqyasda yarış keçirə bilməzdik. Amma hər şeyi ölçüb-biçməliyik. Hədəflərimizi doğru müəyyənləşdirməliyik. İrəliyə doğru addım-addım gedirik. “Sinerji Bakı”nın heyətinə güclü legionerlər cəlb oluna bilər. Biz bütün variantlara baxırıq. Amma biz ilk növbədə özümüzküləri yetişdirməliyik. Artıq “Sinerji Bakı”nın 6 velosipedçisindən 5-i Azərbaycan vətəndaşıdır. 2015-ci ilin mayında prezident Veloparka gələndə heyətdə azərbaycanlı idmançı olub-olmadığını soruşdu. Mən də 16 idmançıdan 12-sinin yerli velosipedçi olduğunu dedim. Ölkə başçısı buna çox sevindi. Gənc velosipedçilərimiz yetişməkdədir. Bu yaxınlarda yeniyetmələr Polşadan yarışdan qayıdıb. İlk dəfə bu turnirdə iştirak etmələrinə baxmayaraq, çox yaxşı çıxış ediblər. İsmayıllıdakı velosiped zavodu bu ildən fəaliyyətə başlayacaq. Avadanlıqlar iyunda ölkəmizə gətiriləcək. Həmin aydan yerli velosipedçilərin istehsalına başlanacaq. Bir neçə aya 28 adda 5 mindən artıq velosiped istehsal olunacaq. Velosipedlərin ümumi adı “İsma” olsa da, hər birinin fərqli adları da olacaq. Uşaqlar üçün nəzərdə tutulan velosiped “Ceyran” adlanacaq. “Qartal” adlı velosiped də istehsal edəcəyik. Hər şeyə kompleks yanaşmışıq. İstehsaldan əvvəl bazar mühiti ilə maraqlandım. Ötən il 77 min velosiped idxal olunub. Gənc qızlarımız martın 8-də velosipedlə yürüş keçirdi. Qadınlar arasında komanda da yaradılıb. BMX komandası da yaradılır. Gənc biznesmenlər bununla bağlı bizə müraciət edib. Əvvəl biz kiməsə müraciət edirdik, indi bizə müraciət edirlər. Bu, çox sevindirici haldır. 4 il əvvəldən velosiped yollarının salınması üçün müəyyən işlərə start verilib. Sumqayıtdan Novxanıya 8 km velosiped yolları çəkilib. Gəncə, Bərdə, Şəmkir və başqa bölgələrimizdə də velosiped yolları salınıb. Bakıda bu məsələ yetərincə mürəkkəbdir. Amma bu məsələ müzakirə olunub. Artıq Milli Parkda velosiped kirayəyə götürüb sürmək olar”.

Aleksandr Qusyatnikov: “İlk dəfə deyil ki, bu yarışda qonaq oluram. Yarış yüksək səviyyədə keçdi. Növbəti dəfə təşkilatçıların kateqoriyanı yüksəltmək haqda düşünəcəklərini fikirləşirəm. Bunun üçün hər cür imkanınız var. Əminəm ki, yaxın zamanlarda “Azərbaycan turu”nun kateqoriyası yüksələcək”.

Roland Hofer: “Çox yaxşı və gərgin mübarizə şəraitində keçən yarış izlədik. Hər mərhələdə çoxlu ötüşmələr izlədik. Sevindirici haldır ki, qəzalar az oldu. Bu da velosipedçilərin inkişafından xəbər verir. İdmançılar otellərdən çox razı qaldı. Azərbaycan velosipedçisinin qalib gəlməsi fantastik oldu. Bu veloturda mülayim hava şəraiti keçdi. Ümumilikdə “Azərbaycan turu” haqda çox müsbət fikir formalaşıb. Fürsətdən istifadə edib, onu da bildirmək istərdim ki, dünən rəsmi şəxslər haqda tura əlavə olunacaq mərhələnin yollarına baxdıq”.

 





Xəbər lenti







İnter Qarabağ Qəbələ Sumqayıt Neftçi AZAL Zirə Kəpəz