"Əvvəllər Ukraynada görüşlərini izlədiyim güləşçilər var idi. İndi isə birbaşa təqlid edə biləcəyim idmançı yoxdur. Valideynlərim mənim üçün ən gözəl nümunədir".
Newsport.az-ın məlumatına görə, bunu Ukraynanı təmsil edən azərbaycanlı yunan-Roma güləşçisi Pərviz Nəsibov "Obşestvennoe Sport" nəşrinə açıqlamasında deyib.
Nəsibov Tokio-2020 Yay Olimpiya Oyunlarında gümüş medal qazanıb. O bildirib ki, əvvəllər güləş tərzini bəyəndiyi idmançılar olsa da, kumiri yoxdur.
23 yaşlı idmançı qarşıdakı hədəflərini də açıqlayıb: "Bəziləri aşağıdan yuxarıya doğru gedir: əvvəl Avropa Çempionatı, sonra dünya çempionatı, ardınca isə olimpiadada.
Məndə isə elə alındı ki, yuxarıdan aşağıya enirəm. 2024-ci ildə Parisdə keçiriləcək Yay Olimpiya Oyunlarınadək Avropa və dünya çempionu olmaq istəyirəm.
Sonra rahat şəkildə deyə bilərəm ki, idmanda əldə oluna biləcək bütün uğurları qazanmışam".