“Qarabağ”ın Avropa Liqasının qrup mərhələsindəki rəqiblərindən olan Ukraynanın “Vorskla” klubunda maliyyə problemləri davam edir.

Newsport.az xarici mətbuata istinadən xəbər verir ki, bu barədə "Vorskla"nın 32 yaşlı qapıçısı Boqdan Şust açıqlamasında deyib:

"Arsenal"la Avropa Liqasının ilk turundakı oyundan əvvəl klub bizə 5 aylıq borcları ödədi. Daha sonra başqa ödəniş olmadı. Klubun hələ də futbolçulara borcu var. İndi isə klubun prezidenti və vitse-prezident paltardəyişmə otağına gəlib bizə vəziyyətin sabit olduğunu, qalan borcların da tezliklə ödəniləcəyini dedi.

Avropa Liqasında iştirak qarşılığında klubumuz müəyyən qədər vəsait qazanıb. Amma bizim bütün borclarımız ödənilməyib".

"Qarabağ" Avroliqanın E qrupunda "Arsenal", "Sportinq" və "Vorskla" klubları ilə mübarizə aparır. 

Bakı Olimpiya Stadionunda oktyabrın 25-də keçiriləcək “Qarabağ” - ”Vorskla” oyunu saat 20:55-də start götürəcək.