Premyer Liqanın debütantı "Sabah"ın yay hazırlıq planı müəyyənləşib.
Newsport.az saytının məlumatına görə, paytaxt təmsilçisi hazırlığın bir hissəsini ölkəmizdə, ikinci hissəsini isə ölkə xaricində keçirəcək.
Belə ki, komanda iyunun 18-də Bakıda bir araya gələcək və bir həftə seleksiya xarakterli toplanış keçəcək. Həmin dövrdə futbolçular həkim müayinəsindən də keçəcək.
Komanda iyunun 25-dən iyulun 2-ə qədər gündə bir dəfə olmaqla məşqləri davam etdirəcək, üstəlik, bir sınaq görüşü keçirəcək. Elşad Əhmədovun rəhbərlik etdiyi kollektiv iyulun 2-dən 13-ə qədər Bakıda ilk toplanışı reallaşdıracaq. Bu toplanış çərçivəsində komanda 3 yoldaşlıq matçı nəzərdə tutulub.
"Sabah" toplanışın ikinci hissəsini Türkiyənin Bolu bölgəsində keçirəcək. İyulun 16-dan 29-a qədər Boluda olacaq komanda 4 yoxlama matçında qüvvəsini sınayacaq. Komanda Türkiyə toplanışı başa vurduqdan sonra Bakıda daha bir yoxlama oyunu keçirəcək.