“İlk oyunda qalib gəlmişdik. Lakin cavab görüşündə də nəticə önəmli idi. Düşünürəm ki, bəxtimiz gətirnədi”.
Bu sözləri "Neftçi"nin qapıçısı Rəşad Əzizli "Neftçi" "Qəbələ" görüşündən sonra (1-3) Newsport.az-ın suallarını cavablandırarkən bildirib:
-İlk görüşdən sonra hər kəs “Neftçi”ni finalda sayırdı. Bu, sizdə arxayınlıq yaratmamışdı?
-Xeyr, arxayınlıq yox idi. Sadəcə, oyunumuz alınmadı. Həmişə qalib gəlmək də olmaz, uduzmağı da bacarmaq lazımdır.
-Hansı qolda özünü təqsirkar hesab edirsən?
-Hər üç qolda.
-İlk qolu siz vurdunuz. Lakin sonda məğlub oldunuz. Bunu nə ilə əlaqələndirirsən?
-Komanda gec toparlandı. Vaxt isə çatmadı. Düşünürəm ki, bir qol vura bilsəydik, ardı gələcəkdi. Ancaq alınmadı.
-Komandanın finala vəsiqə qazanmamağını sırf bəxtlə əlaqələndirmək olar?
-Bəli, iki oyunun ikisində də üstün olan tərəf biz idik. Sadəcə, diqqətsizlik etdik və bunun acısını da yaşadıq.
-Yəqinki finalda “Qəbələ”yə azarkeşlik edərsiniz və çempionatda dördüncü yer üçün mübarizə apararsınız?
-Xeyr, biz heç bir komandaya azarkeşlik etmirik. Sadəcə, öz oyunumuzu oynayıb, qələbə qazanmaq lazımdır. İrəli baxmağa çalışacağıq.
-Komandanın Avroliqa şanslarını necə qiymətləndirirsən?
-Şanslarımız yenə də qalır. Ümid edirəm ki, layiq olduğumuz yeri tutacağıq.
-Dörd gün sonra yenə “Qəbələ”yə qarşı oynayacaqsınız. Bu haqda fikirin nədir? Rövanş kimi baxmaq olarmı bu qarşılaşmaya?
-Bu görüşü yaddan çıxardıb, yalnız qələbə üçün meydana çıxacağıq. Düşünürəm ki, qələbə olsa, haqq öz yerini tapacaq.