Ndlovunun komandası üçün penalti verən referiyə ömürlük cəza

Kateqoriya: Dünya futbolu | Tarix: 21.03.2017 01:08

2018-ci il dünya çempionatının Cənubi Afrika Respublikası (CAR) və Seneqal yığmaları arasında keçirilmiş seçmə matçının baş hakimi Jozef Lampti ömürlük diskvalifikasiyaya məruz qalıb.

Newsport.az-ın məlumatına görə, qanalı referi oyunun nəticəsinə qeyri-qanuni müdaxilədə ittiham olunub. 43 yaşlı ədalət təmsilçisi əsasnamənin 69.1 maddəsi üzrə günahkar bilinib.

CAR - Seneqal matçı 2016-cı il noyabrın 12-də keçirilib. Görüş meydan sahiblərinin qələbəsi ilə yekunlaşıb - 2:1. 43-cü dəqiqədə Lampti seneqallıların qapısına mübahisəli penalti təyin edib. Bunun nəticəsində meydan sahiblərindən Tulani Xlatşvayo hesabı açıb.

Qeyd edək ki, "Qarabağ"ın hücumçusu Dino Ndlovu CAR millisində 4 dəfə oynayıb. O, son zamanlar yığmaya çağırılmır.