Çempionlar Liqasında qrup mərhələsinin III tur qarşılaşmasında "Mançester Siti" "Barselona"nın qonağı olacaq.

Newsport.az-ın məlumatına görə, "şəhərlilər"in baş məşqçisi Pep Qvardiola sabiq klubuna qarşı keçirəcəkləri oyunla bağlı fikirlərini bölüşüb. Təcrübəli mütəxəssiz işlərini çətinləşdirən əsas amilin, məhz Messi olduğunu vurğulayıb: "Messinin qarşısını almaq üçün heç bir texnika bilmirəm. Bilsəm, futbolçulara öyrədərdim. 90 dəqiqə uzun müddətdir. Futbolçularıma çoxlu qol epizodu yaratmağı yox, əllərinə düşən şansları dəyərləndirməsini tapşırmışam. "Barselona" ilə qarşılaşma bizim üçün öz səviyyəmizi bilmək baxımından çox faydalı olacaq".

Qvardiola Messinin İngiltərədə oynamaq istəyi ilə bağlı yayılan söz-söhbətlərə münasibət bildirib: "Ola bilər ki, Messi uşaqları ingilis dilini öyrənsinlər deyə bunu istəsin. Əyər Messi "Barça"nı tərk etməyə qərar versə onu almaq istəyən 7 və ya 8 nəhəng klub olacaq. Ancaq mən bu yay Messi, Neymar, Suarez, Buskets, İniesta və başqaları ilə danışmamışam. Buna əmin ola bilərsiniz".