Etdiyim dəyişikliklər fayda etmədi - İspaniyanın baş məşqçisi

Kateqoriya: Dünya futbolu | Tarix: 21.05.2016 22:35

Bakıda təşkil edilən 17 yaşadək futbolçular arasında Avropa çempionatına yekun vuruldu. Həlledici oyunda Portuqaliya millisi İspaniyanı oyunsonrası penaltilər seriyasında məğlub edərək çempion oldu.

Newsport.az-ın məlumatına görə, oyundan sonra İspaniya millisinin baş məşqçisi Santi Denia jurnalistlərin suallarını cavablandırıb.İspan mütəxəssis bunları deyib:

- Oyuna qələbə üçün çıxmışdıq. Oyunun gedişatından qarşılaşmanın penaltilərə doğru getdiyini gördüm. Buna görə qapıçını dəyişdim. Ancaq alınmadı, məğlub olduq.

- Rəqibdən bu cür oyun gözləyirdiz?

- Rəqibi analisz etmişdik. Necə futbol oynadıqlarını bilirdik. Məncə, oyun bərabər səviyyədə keçdi. Sonda penaltilərdə uduzduq.

- Almaniya ilə oyunda matça sonradan daxil olan Brahim Dias komandaya qələbə qazandırdı. Bu oyunda da bu cür taktiki gedişlər etmək mümkün deyildi?

- Təkcə Almaniya ilə oyunda yox, ondan öncəki matçlarda da etdiyim dəyişikliklər sayəsində qələbə qazanmışdıq. Ancaq bu gün etdiyim dəyişikliklər fayda etmədi.

- Adətən birinci penaltini kapitanlar yerinə yetirir. Ancaq bu gün tərsinə oldu. Bu, sizin göstərişiniz idi?

- Penaltilərdən öncə futbolçunun özüylə danışdım. O özü sonuncu vurmaq istədiyini dedi. Yəni bu, ani qəbul edilmiş qərar idi. Öncədən planlaşdırmamışdıq.

- Almaniya ilə oyundakı ssenarini təkrarlamağa nə mane oldu?

- Komandanın fəlsəfəsi nədisə, komanda ona uyğun oynamalıdı. Bu matçda İvan Martinin yeri görünürdü. Portuqaliya bu gün yaxşı təsir bağışladı. Qələbəyə görə onları təbrik edirəm.

Paylaş