FİFA prezidenti Canni İnfantino vəzifəsini qorumaq üçün ABŞ Prezidenti Donald Trampın administrasiyasının dəstəyini almağa çalışır.

Newsport.az xəbər verir ki, bu barədə “New York Post” qəzeti məlumat yayıb.

Mənbənin məlumatına görə, İnfantino ABŞ dövlət katibi Marko Rubio ilə görüşmək və futbolun Amerikanın “yumşaq güc” vasitələrindən birinə çevrilə biləcəyini müzakirə etmək niyyətindədir.

Daha əvvəl FIFA dünya çempionatları və digər yarışların kommersiya hüquqlarını idarə etmək üçün “FIFA Forward Enterprises” adlı törəmə strukturun yaradılacağını açıqlamışdı. Layihənin məqsədi qurumun gəlirlərini artırmaqdır.

Lakin bu təşəbbüs UEFA, KONKAKAF və Asiya Futbol Konfederasiyası tərəfindən sərt etirazla qarşılanıb.

Qeyd edək ki, Canni İnfantino 2016-cı ilin fevralından FIFA prezidenti vəzifəsini icra edir. O, bundan əvvəl UEFA-da çalışıb.