Toşikazu Yamanişi Yaponiyanın Kobe şəhərində keçirilən yarışda 20 km məsafəyə idman yerişi üzrə dünya rekordunu yeniləyib. O, məsafəni 1 saat 16 dəqiqə 10 saniyəyə qət edib.

Əvvəlki rekord digər Yaponiya təmsilçisi Yusuke Suzukiyə məxsus idi və 2015-ci ilin martından (1:16.36) bu günə qədər qırılmaz qalırdı.

Yamanişinin 29 yaşı var. O, 2019 və 2022-ci il dünya çempionatlarında 20 km məsafəyə idman yerişində qızıl medal qazanıb və eyni növdə 2020-ci ildə Tokio Olimpiadasında bürünc medala yiyələnib. Yamanişi 2017-ci ildə Yay Universiadasında 1:27.30 nəticə ilə qızıl medal qazanıb. Universiteti bitirdikdən sonra Toşikazu “Toyota Group” idman klubunun üzvüdür.