“Ölkəmizdəki müharibə futbolçularımıza əlavə ruh verir”.
Newsport.az-ın məlumatına görə, bu sözləri Ukrayna millisinin baş məşqçisi Sergey Rebrov deyib.
Bu gün Ukrayna Avro-2024-də mübarizəyə qoşulur. E qrupunda yarışan komandanın ilk rəqibi Rumıniya millisidir.
Matçla bağlı təşkil edilən mətbuat konfransında S.Rebrov daha sonra deyib: “Əgər biz bura Ukraynanın ruhunu göstərmək üçün gəlmişiksə, bu, çox vacibdir. Bu turnir doğrudan da ölkəmizin ruhu ilə bağlıdır”.
Rebrov bildirib ki, Rumıniya son vaxtlar uğur qazanıb: “Onların çox yaxşı gənc futbolçuları var. Rəqibimiz nəyin necə olduğunu yaxşı başa düşən komandadır. Onların çox sürətli ifaçıları var. Hansılar ki, komandanı Avro-2024-ə gətiriblər”.
Sergey Rebrov Ukraynanın bu səviyyədə yarışda çıxış etməsinin nə qədər vacib olduğunu da vurğulayıb: “Ölkəmizdə futbol indi birinci yerdə deyil. Amma bu cür turnir bütün oyunçularımız üçün böyük zövqdür. Baxmayaraq ki, indi bizim hamımız üçün çətin vaxtdır”.
Xatırladaq ki, Rumıniya - Ukrayna matçı bu gün Bakı vaxtı ilə saat 17:00-da başlanacaq.