Azərbaycan Premyer Liqasının 17-ci turu iki futbolçunun ölkə çempionatında 350-ci oyununu keçirməsi ilə əlamətdar olub.

Newsprot.az xəbər verir ki, “Qarabağ”ın kapitanı Maksim Medvedev “Qəbələ” (1:0), “Sumqayıt”ın kapitanı Vurğun Hüseynov “Səbail”lə qarşılaşmada (2:0) yubileyini qeyd edib.

Hər iki müdafiəçi 350-ci görüşünü doğma meydanda keçirib.

Bununla da 1992-ci ildən keçirilən yarışda 350 və daha çox oyuna çıxanların sayı 12-yə çatıb. Maksimlə Vurğuna qədər 10 futbolçu buna nail olub.

Debütü 2006/07 mövsümünə təsadüf edən Maksim bu müddətdə 12 qol vurub. 33 yaşlı müdafiəçi yalnız “Qarabağ”da forma geyinib. O, bir klubda ən çox oyun keçirən futbolçudur.

İlk oyunu 2005/06 mövsümünə təsadüf edən Vurğunun hesabında 10 qol var. 34 yaşlı müdafiəçi debüt etdiyi “Turan” və indi şərəfini qoruduğu “Sumqayıt”dan başqa “Qəbələ”də də çıxış edib.(pfl.az)