Futbol üzrə İspaniya Sequndasında 34-cü turun oyunları keçirilib.

Newsport.az xəbər verir ki, Azərbaycan yığmasının yarımmüdafiəçisi Eddi İsrafilovun formasını geyindiyi “Alkorkon” da növbəti matçına çıxıb. 

Sözügedən kollektiv səfərdə “Saraqosa” ilə üz-üzə gəlib. Futbolçumuzun komandası bu qarşılaşmadan qələbə ilə ayrılıb - 2:0.

İsrafilov da bu görüşün iştirakçısı olub. O, start heyətdə meydana çıxıb və sonadək oynayıb. 

Komandasının 4-cü dəqiqədə vurduğu ilk qolun məhsuldar ötürməsi də məhz Eddidən gəlib. Millimizin üzvü 36-cı dəqiqədə sarı vərəqə ilə də cəzalanıb.

Hazırda 47 xala malik “Alkorkon” 22 iştirakçı arasında 11-ci pillədə qərarlaşıb.