Bu gün AFFA-nın təşkil etdiyi “Bakcell U-14 Elit Kuboku” turnirə yekun vurulub.

Newsport.az-ın məlumatına görə, 16 komandanın mübarizə apardığı turnirin son günündə həlledici qarşılaşmalar keçirilib. 

III yer uğrunda oyunda “Bakı” və “Neftçi” komandaları qarşılaşıb. Qarşılaşmanın əsas vaxtı 1:1 hesabı ilə başa çatıb. Əlavə vaxtda daha 1 qol vuran “Bakı” turniri üçüncü pillədə başa vurub.

Final oyunu “İnter” və “Qəbələ” komandaları arasında keçirilib. Rəqibini 3:0 hesabı ilə məğlub edən “Qəbələ” “Bakcell U-14 Elit Kuboku” turnirinin qalibi adını qazanıb.

Final oyunu başa çatdıqdan sonra mükafatlandırma mərasimi təşkil olunub. Mükafatları AFFA-nın baş katibi Elxan Məmmədov, Bakcell şirkətinin nümayəndəsi Ayaz Əhmədov, Azərbaycan milli komandasının baş məşqçisi Robert Prosineçki, Məşqçilər Komitəsinin sədri Vaqif Sadıqov, “Qəbələ” klubunun vitse-prezidenti Fariz Nəcəfov və “İnter” klubunun prezidenti Georgi Nikolov təqdim ediblər.

Yığmamızın xorvatiyalı çalışdırıcısının təqdim etdiyi “Bakcell U-14 Elit Kuboku”nu başı üzərinə qaldıran "Qəbələ"nin U-14 komandasının üzvləri fərdi mükafatlarla da təltif olunub. G.Nikolov turnirin ən yaxşı futbolçusu seçilən İdris İnqilablıya, F.Nəcəfov isə finalda dubl müəllifi olan Samir Qurbanova yarışın ən sərrast oyunçusu mükafatını təqdim edib.