Bu gün Azərbaycan Premyer Liqasında XV turun növbəti oyunları keçiriləcək.

Newsport.az-ın məlumatına görə, baş tutacaq iki oyunla tura yekun vurulacaq.

Günün ilk oyunu Zirədə baş tutacaq. Fasilədə baş məşqçisi Adil Şükürovla yollarını ayıran və Ayxan Abbasova tapşırılan “Zirə” öz meydanında AZAL-ı qəbul edəcək. “Qartallar” autsayder rəqibini məğlub etməklə, Qəbələ səfərində 1 xalla qayıdan “Sumqayıt”la xallarını bərabərləşdirə bilər. AZAL isə sonuncu pillədən yaxa qurtarmaq üçün öncə “Zirə”ni məğlub etməli, daha sonra isə “Neftçi”nin “Qarabağ”la səfərdə xal itirməsini gözləməlidir.

Tura Azərbaycan derbisi ilə, “Qarabağ” – “Neftçi” oyunu ilə yekun vurulacaq. Ağdam klubu birinci pillədəki yerini daha da möhkəmlətmək istəyirsə, “Qəbələ”nin xal itirməsindən istifadə etməli, “Neftçi” üzərində mütləq qələbə qazanmalıdı. Qışda heyətində böyük dəyişikliklər edən “Neftçi” isə özünü sübut etmək üçün mübarizə aparacaq.