Avropa Liqasının I təsnifat mərhələsinin ilk oyunları çərçivəsində Bakıda baş tutan "Kəpəz” – "Daçiya” matçında hesab açılmayıb.

Newsport.az-ın məlumatına görə, qarşılaşmadan sonra Moldova təmsilçisinin prezidenti Adlan Şişxanov jurnalistlərin suallarını cavablandırıb. 
 
- Qarşılaşma haqqında fikirləriniz necədi?
- Bizim komandamız Avrokuboklar üçün çox darıxmışdı. Uşaqlar bu gün yaxşı oynadılar. Düzü, komandamızın belə oynayacağını gözləyirdim. İlk görüşdə səfərdə əldə edilən heç-heçəni yaxşı nəticə saymaq olar. Düzdü, ən yaxşı nəticə deyil, amma bu, fəlakət adlandıra biləcəyimiz nəticə də deyil. 
 
- Mətbuat konfransı zamanı komandanın baş məşqçisi demişdi ki, bizim prezident səfərdəki heç-heçəni yaxşı nəticə kimi qəbul etmir. Siz isə bugünkü oyunun nəticəsini yaxşı dəyərləndirirsiniz...
- Mən həmişə demişəm, biz hər zaman, evdə ya səfərdə, həmişə qələbə üçün oynamışıq. Bu gün isə heç-heçə əldə etdik. Bu bizim üçün pis nəticə deyil. Çünki "Kəpəz” çox istəkli futbol oynayırdı. 
 
- Sizin komandanızı prezident, yoxsa baş məşqçi idarə edir?
- Mən orda olanda komandam daha yaxşı futbol oynayır. Lazım olsa, lap meydançaya da çıxaram. 
 
- Bəs sizin bu hərəkətiniz baş məşqçiyə hörmətsizlik deyil?
- Nəyə görə? Biz uzun müddətdi belə çalışırıq. Belə vəziyyətdə özümüzü normal hiss edirik. 
 
- Oyuna müdaxilələri də siz edirsiniz?
- Futboldan sual verin, mən də cavab verim. 
 
- Cavab oyununda hər şeyin sizin üçün yaxşı olacağını dediniz. Öz komandanıza bu qədər inamınız var?
- Mən yenə təkrar edirəm. "Kəpəz” uzun müddətdi Avropa oynamır. Biz isə hər il Avropa yarışlarına qatılırıq. Rəqib çox həvəsli idi. Növbəti oyunda hər şey fərqli olacaq. 
 
- "Kəpəz”dən hansısa oyunçu xoşunuza gəldimi?
- Bütün oyunçular yaxşı təsir bağışladılar. Uşaqlar hamısı bütün güclərini ortaya qoymuşdular. Bir klub prezidenti kimi mənə xoşdu ki, biz yüzlərlə kilometr yolu boşuna gəlməmişik və gözəl oyun izlədik.