“Qəbələ” qapıçısı Dmitri Bezotosnı ilə müqavilə müddətini uzadıb.

Newsport.az klubun saytına istinadən xəbər verir ki, ukraynalı futbolçu ilə yeni anlaşma daha bir il müddətinə nəzərdə tutulub. Əvvəlki müqaviləsi 2015-2016-cı illər mövsümünün sonunda başa çatan 32 yaşlı qolkiper daha bir il “qırmızı-qara” formanı geyinəcək. Onunla yeni anlaşma 2017-ci ilin iyun ayında, 2016/17 mövsümünün sonunda başa çatacaq.

Xatırladaq ki, 2015-ci ilin əvvəlindən “Qəbələ”nin şərəfini qoruyan Bezotosnı komandanın heyətində 2014/15 və 2015/16 mövsümlərində Premyer Liqanın bürünc mükafatını qazanıb. O, “qırmızı-qaralar”ın heyətində keçirdiyi 61 matçda 41 qol buraxıb. Ukraynalı qapıçı Premyer Liqada 43 oyunda 23, Azərbaycan kubokunda 6 matçda 7, Avropa Liqasında 12 qarşılaşmada 11 dəfə qapısında qol görüb. Dmitri 2015-2016-cı illər mövsümündə Premyer Liqada ən çox “quru” oyun keçirən qapıçıdı. O, meydana çıxdığı 28 matçın 18-də qapısını toxunulmaz saxlayıb.