İndiki meyarlara görə sanballı büdcəyə malik olan “Neftçi”nin biabırçı çıxışı ölkənin ən köklü klubunun adına yaraşmır. Futbol camiəsində də, demək olar ki, hamı bu gün “Neftçi”dəki bərbad idarəçilikdən danışır. Ağ-qaraların indiki durumuna 5 il bu klubun şərəfini qorumuş, kapitan sarğısını daşımış Rail Məlikov da münasibət bildirib. 

Newsport.az-ın məlumatına görə, “Futbol+” qəzetinə danışan təcrübəli müdafiəçi də “Neftçi”ni tənqid edib:

“Neftçi” xalqın komandasıdı, hanı o xalq, hanı o azarkeşlər? 50-60 azarkeş qalıb, onlar da hər oyunda komandanı ələ salır. Biz oynayan vaxtlarda “Xəzər Lənkəran”, “Bakı”, “İnter”, “Qarabağ”, “Simurq” kimi iddialı rəqiblər var idi. Onların arasında baş çıxarıb çempion olurduq. Çünki böyük-kiçik vardı, hər kəs öz işini bilirdi. Mitreski, Flavinyo, Mpenza, Stamenkoviç kimi legionerləri meydana çıxarırdım, sözümü deyirdim. Biri ağzını açıb cavab vermirdi. Ancaq indikilər...

Mən vaxtilə Zaur Tağızadə, Rəşad Sadıqov kimi kapitanların rəhbərliyi altında oynamışam, onlardan görüb-götürmüşəm. Bu gün də eynisi AZAL-dadı. “Neftçi”də sarğı gündə bir qolda gəzir. Araz, Ruslan, Ramos... Kapitan yerli olmalıdı, o da komandada liderlik etməlidi. Ailə ab-havası, birlik olmayan komandadan uğur gözləməyə dəyməz”.