“Qarabağ”ın müdafiəçisi Ansi Aqolli Newsport.az saytına müsahibə verib.

- Premyer Liqanın 24-cü turunda “Zirə” üzərində 2:0 hesablı qələbə qazandınız. Görüşlə bağlı nə deyə bilərsən?

- Oyun asan keçmədi. “Zirə” çox yaxşı mövsüm keçirir. Komandanın gücü də, qazandığı nəticələr də məlumdu. Çətin qarşılaşma alındı. Amma vacib qələbə qazandıq və yolumuza davam edirik.

- “Zirə”nin cari mövsümdəki çıxışını sürpriz hesab etmək olar?

- Təbii ki, sürprizdi. Onlar ilk dəfədir ki, Premyer Liqada çıxış edirlər. Amma yaxşı heyətləri var. Mövsümün əvvəlində “Zirə”nin uğurlu çıxışı sürpriz olsa da, hazırda bu faktdı. Daha təəccüblü deyil.

- Mövsümün əvvəlində düşünərdin ki, çempionluq uğrunda məhz “Zirə” ilə mübarizə apacaqsınız?

- Bunu heç kim düşünmürdü. Amma fakt budur ki, hazırda “Zirə” inamlı çıxış edir. Güclü rəqibdilər və çempionluq uğrunda yarışırlar.

- Demək olar ki, bugünkü qələbə “Qarabağ”I çempionluğa bir qədər də yaxınlaşdırdı?

- Bu gün 3 xal qazanmaq bizim üçün vacib idi. Əsas rəqiblərimizdən birinə qalib gəldik. Amma demək olmaz ki, çempionluğun taleyini həll etdik. Qarşıda hələ qazanılmalı çox xallar var.

- Mövsümün sonunda “Qarabağ”la müqavilən başa çatacaq. Sözləşməni uzatmaq fikrin var?

- Hazırda müqavilə haqda düşünmürəm. Bütün fikrimi indi komandamın oyununa, öz çıxışıma yönəltmişəm. Çalışıram ki, hər zaman komandamın uğuru üçün əlimdən gələni edim. Yeni müqavilə haqda danışmaq üçün hələ vaxtımız olacaq.