"Xəzər Lənkəran"ın hücumçusu Orxan Əliyevin müsahibəsi

- Son dövrlər niyə meydanda çox az görünürsünüz?
- Çünki menisk zədəsindən əziyyət çəkirəm.

- Hazırda vəziyyətiniz necədir?
- Özümü çox yaxşı hiss edirəm. Allah eləsin ki, yanvar ayından məşqlərə başlaya bilim.

- "Xəzər Lənkəran"dakı çıxışınızı necə qiymətləndirərdiniz?
- Pis başlamamışdım. Oynayırdım, komandaya faydalı olmağa çalışırdım. Amma zədə özümü 100 faiz göstərməyimə mane oldu.

- Hansı oyun sizin üçün daha uğurlu və ya uğursuz oldu?
- Bütün oyunlarımız çətin keçirdi. "Xəzər Lənkəran" təlim-məşq toplanışında olanda, mən evdə idim. Komandaya yalnız qayıtdıqdan sonra qoşula bildim. Ona görə mənə daha da çətin idi.

- "Xəzər Lənkəran"da qalmaq istəyirsiniz, ya başqa klublardan təklif var?
- Düzünü deyim ki, şəxsən özümə zəng edən olmayıb. Eyni zamanda "Xəzər Lənkəran"la müqaviləmin vaxtı da bitir. Amma hələ klubla bu barədə heç bir müzakirəmiz olmayıb.

- "Xəzər Lənkəran" hazırda 12 xalla 9-cu yerdə qərarlaşıb. Niyə?
- İnanın ki, "Xəzər Lənkəran"ı 9-cu pillədə görmək çox ağırdır. Amma bu, futboldur, belə hallar da olur.

- FİFA transfer qadağasını yanvar ayında götürməsə, komanda mövsümün sonunadək əlində olan heyətlə mübarizə aparmalı olacaq. Belə olan halda komandanız nəyə ümid edə bilər?
- Qadağa götürülməsə, komandamıza çox çətin olacaq. Amma ümid edirəm ki, hər şey yaxşı olacaq.

- Siz "Sumqayıt"da oynayanda millinin baş məşqçisi Robert Prosineçkinin daha çox diqqətini çəkirdiniz. Amma cənub klubuna keçəndən sonra diqqətdən kənarda qalmısınız...
- Hər şey yoluna düşəcək. Sadəcə, oynamağım və özümü yaxşı tərəfdən göstərməyim lazımdır. Yığma komandaya yalnız belə olan halda düşmək mümkündür. Bunun üçün var gücümlə çalışacağam.

azerisport.az