Samir Abasov: “Məğlub olsaydıq, sadəcə təəssüflənməzdim, dəli olardım”

Kateqoriya: Ölkə futbolu | Tarix: 11.12.2015 19:14

Azərbaycan Premyer Liqasının XVI turunda "Suqmayıt” səfərdə "İnter”in qonağı olub. "İnter Arena” da baş tutan oyun "Sumqayıt”ın 3-2 hesablı qələbəsi ilə yekunlaşıb.

Newsport.az-ın məlumatına görə, oyundan sonra keçirilən mətbuat konfransında "Sumqayıt”ın baş məşqçisi Samir Abasov qarşılaşmanı belə şərh edib:

"Sanki, "Kəpəz”lə oyunun davamı idi. "İnter”lə gərgin, maraqlı oyun alındı, azarkeşlər çox qol gördülər. Həyəcanlı bir görüş alındı, heç-heçə də edə bilərdik, məğlub da ola bilərdik, böyükhesablı qələbə qazana bilərdik. Bu hesab da məni razı salır. "Qarabağ” kimi komandanın 1 qol vurub məğlub etdiyi komandanı 3 qolla üstələməyimiz sevindiricidir. Heyətdə zədəli oyunçularımız az deyildi, buna baxmayaraq, futbolçularımız can qoydular və qələbə qazandılar. Zaurab Xizanişvili ilə Ağabala Ramazanovun epizoduna gəlincə, konkret danışa bilmirəm. Penaltinin olub-olmadığını deməyə çəkinirəm. Düzdür, mən həmin anda reaksiya verdim. Amma unutmayaq ki, insanın reaksiyası öz istəyinə uyğun olur, mən də lehimizə penalti istəyirdim. Amma epizoda baxdıqdan sonra dediyin bəzən səhv çıxır. Ümumilikdə götürsək, 3-0 hesabı ilə irəlidə olduğumuz oyunda heç-heçə etsəydik və ya məğlub olsaydıq, sadəcə təəssüflənməzdim, dəli olardım”

Paylaş