UEFA Konfrans Liqasının cari mövsümündə üçüncü təsnifat mərhələsinin “Zirə” ilə “Osiyek” (Xorvatiya) arasında cavab qarşılaşmasında təmsilçimizin yerli futbolçuları oyunsonrası penalti zərbələrini dəqiq yerinə yetirməmişdi. “Qartallar” o zaman qapıçı Tyaqo Silvanın rəqibin zərbələrini dəf etməsi sayəsində mərhələ keçməyə nail olmuşdu.

Dünən isə qəsəbə klubunun baş məşqçisi Rəşad Sadıqov “Legends Cup”da “Premyer Liqa məşqçiləri” – “Neftçi 2000-lər” minifutbol matçında penaltini dəqiq yerinə yetirib. Onun son zərbəsi sayəsində 1:1 hesabı ilə bitən matçın sonunda penaltilərdə üstün olan (3:2) məşqçilər komandası qalib gəlib.

42 yaşlı mütəxəssis həmin anları öz “Instagram” hesabının hekayə bölməsində penaltini qaçıran futbolçularını işarələyək paylaşıb. Bununla  Sadıqov oyunçularına penalti zərbəsini necə vurmaq lazım olduğunu əyani göstərib.