"Qarabağ" Azərbaycan Kuboku yarımfinal mərhələsinin ilk oyunu çərçivəsində səfərdə "Araz-Naxçıvan"a 0:1 hesabı ilə uduzub.

Newsport.az xəbər verir ki, Ağdam təmsilçisinin baş məşqçisi Qurban Qurbanov matçdan sonra keçirilən mətbuat konfransında jurnalistlərin suallarını cavablandırıb:

- "Araz-Naxçıvan"ı təbrik edirəm. Çox vuruşdular, qalib gəlmək üçün hər şey etdilər. Qarşıda cavab oyunu var. Oyun haqda çox danışılası bir şey yoxdur. Elə də keyfiyyətli oyun olmadı. Kubok matçları hər zaman çempionat oyunlarından fərqlənib. Cavab görüşünə hazırlaşacağıq. Hələ xeyli vaxtımız var.

– Avrokuboklarda “Qarabağ”a qarşı ədalətsiz qərarlar çox olub, amma heç birində planşet sındıraraq reaksiya vermirdiniz. Fikirlər var ki, Qurban Qurbanov yerli klublara məğlubiyyəti qəbul edə bilmir…

- Yox, niyə ki? Dəfələrlə məğlub olmuşam və özümü normal aparmışam. İnsanıq da, aqressiya olur. Ola bilər ki, epizod penalti idi. Deyirlər ki, penalti kosmosdan görünməlidir. Mən də istəyirəm ki, oyun daha sürətli, dinamik getsin. Oyunda pauza həddindən çox oldu. Hakim də öz ritmini itirir. Yerli komandalara məğlubiyyəti qəbul etməməyimlə bağlı fikri qəbul etmirəm. Əksinə, çox istəyərəm ki, hər komanda "Qarabağ"a qalib gəlsin və o klubun rəhbərliyində futbola sevgi daha da çox olsun, maraq böyüsün. Biz də insanıq, ömür boyu sakit ola bilmərik.

- Penalti epizodunu necə şərh edərdiniz?

- Planşetə penalti epizoduna görə vurdum. Onu da gördüz, gözdən qaçırmadız. Nəisə.