Avropa Liqasında qrup mərhələsinin V tur oyunlarına start verilib.

Newsport.az-ın məlumatına görə, Bakı vaxtı ilə saat 20:00-da başlayan oyunlar arasında C qrupunun da matçı olub. 

Təmsilçimiz "Qəbələ”nin də yer aldığı qrupun iki komandası – "Krasnodar” və Dortmund "Borussiya”sı Rusiyada üz-üzə gəlib. Matçın 2-ci dəqiqəsində Pavel Mamayevin penaltidən vurduğu qolla və demək olar, xeyli bəxtinin gətirməsiylə qələbə qazanan "Krasnodar” adını pley-offa yazdırıb. 
 
Özü də 1:0 hesablı qələbə ilə Dortmund klubu üzərində şəxsi görüşlərdəki üstünlüyə görə liderliyə yüksələn "buğalar” "Qəbələ”nin "kitabını bağlayıb”. Onsuz da 1/16 final şansları cüzi olan təmsilçimiz bu nəticədən sonra meydana çıxmamış Avropa Liqasıyla vidalaşacağını öyrənib. Elə rəqibimiz olacaq PAOK da artıq heç bir iddia sahibi deyil.