"Azərbaycan millisi ilə oyunda futbolçularımdan qələbə gözləyirəm. Komandamızın oyun keyfiyyətinin birinci plana keçməsini, taktiki baxımdan intizamlı olmasını istəyirəm".

Newsport.az xəbər verir ki, bu sözləri Serbiyanın U-21 millisinin baş məşqçisi Lyubinko Druloviç bildirib. O, Serbiya Futbol Federesiyasının mətbuat xidmətinə açıqlamasında bu gün Avropa çempionatının seçmə mərhələsində Azərbaycan U-21 millisi ilə Bakıda keçiriləcək oyunla bağlı fikirlərini bildirib.

Druloviçin sözlərinə görə, Azərbaycan millisi istisnasız olaraq müdafiədə oynayan, amma hücumda da yaxşı futbolçuları olan komandadır: "Uzun məsafə və Bakının istisi səbəbindən uyğunlaşmaya vaxt getdi. Amma mən əminəm ki, meydanda yaxşı oyun sərgiləyəcəyik".

Qeyd edək ki, Azərbaycan və Serbiya U-21 milli komandaları arasında görüş bu gün saat 19:00-da başlanacaq. Oyun "Dalğa Arena"da təşkil ediləcək.

Hazırda Azərbaycan millisi 7 oyundan 3 xalla qrupda sonuncu, Serbiya isə 8 matçdan 10 xalla 3-cü yeri tutur. Hər iki komanda qrupdan çıxmaq şansını tamamilə itirib.