AÇ-2020: Daha bir ölkədən azarkeşlərə “yaşıl işıq”

AÇ-2020-nin İtaliyanın paytaxtı Romada keçiriləcək oyunlarına azarkeşlər buraxılacaq.
 
Newsport.az xəbər verir ki, bu barədə İtaliya Futbol Federasiyasının prezidenti Qabriele Qravina yerli qurumun rəsmi saytına açıqlamasında deyib.
 
Onun sözlərinə görə, artıq məsələ ilə bağlı yerli hökumətdən razılıq alınıb. Qravina oyunlar zamanı tribunada Romadakı Olimpiya Stadionunun ümumi azarkeş tutumunun (72 000 tamaşaçı) 25 faizi qədər tamaşaçı olacağını bildirib. Bu isə o deməkdir ki, hər qarşılaşmada 18 000 fanat iştirak edəcək.
 
Daha əvvəl Bakı, Sankt-Peterburq (Rusiya), Budapeşt (Macarıstan), Amsterdam (Niderland), Buxarest (Rumıniya), Kopenhagen (Danimarka) və Qlazqo (Şotlandiya) UEFA-ya azarkeşlərlə bağlı təminat verib.
 
Qeyd edək ki, koronavirus pandemiyasına görə təxirə salınmış AÇ-2020-yə Sankt-Peterburq (Rusiya), London (İngiltərə), Münhen (Almaniya), Roma (İtaliya), Buxarest (Rumıniya), Dublin (İrlandiya), Kopenhagen (Danimarka), Bilbao (İspaniya), Qlazqo (Şotlandiya), Budapeşt (Macarıstan) və Amsterdam (Niderland) şəhərləri də ev sahibliyi etməlidir. Oyunlar bu il iyunun 11-dən iyulun 11-dək keçiriləcək.
 
Təqvimə əsasən, Bakı Olimpiya Stadionu A qrupunun İsveçrə - Uels, Türkiyə - Uels və Türkiyə - İsveçrə qarşılaşmalarına, eləcə də 1/4 final mərhələsinin 1 oyununa ev sahibliyi edəcək. 4 oyununun hər birində ümumi tamaşaçı tutumunun 50 faizi qədər azarkeş iştirak edə biləcək.




Xəbər lenti







Neftçi Qarabağ Qəbələ Sumqayıt Kəpəz Sabah Araz-Naxçıvan Səbail Turan Tovuz Zirə
Banner left
Banner right