2017-ci ilin iyulun 8-də "Verder"lə yoxlama oyununda ürəyi dayanan və 1 il sonra komadan ayılan "Ayaks"ın futbolçusu Abdelhaq  Nurinin vəziyyəti yaxşılığa doğru gedir.

Newsport.az-ın məlumatına görə, 22 yaşlı yarımmüdafiəçinin qardaşı Əbdürrəhim Niderland televiziyasına bu barədə açıqlama verib:

"Yatır, oyanır, yemək yeyir, amma yataqdan dura bilmir. Ötən il komadan ayıldıqdan sonra qaşları ilə bizimlə dialoq qurur. Ailəsi ilə birgə olduğunu başa düşür. Onunla tez-tez danışırıq və oyunları da izləyirik".

Mərakeş əsilli niderlandlı oyunçunun "Verder"lə qarşılaşmada ürək ritmi pozulmuşdu. Onun sonradan beynində problem olduğu aşkarlanmışdı. Futbolçu 2018-ci ilin avqustunda komadan ayılmışdı. Nurinin ev şəraitində müalicəsi davam etdirilir.