Dünya Çempionatının seçmə mərhələsində Azərbaycan yığması Şimali İrlandiyaya məğlub olub - 0:1.
Newsport.az-ın məlumatına görə, oyundan sonra britaniyalıların baş məşqçisi Maykl Onill qələbəni şərh edib:
"Çətin oyun oldu. Yaxşı komandaya qarşı oynadıq. Prosineçki güclü heyyət yığıb. Oyunun əvvəlləri çətin keçdi. Bizə lazım olan qələbəni qazandıq. Bəzi futbolçularımız 6 həftə sonra bizə qoşulsa da, qalib gələ bildik".
İrlandiyalı baş məşqçi daha sonra jurnalistlərin suallarını cavablandırıb.
- Conni İvansın oyunu haqda nə deyə bilərsiniz ?
- Əsl mərkəz müdafiəçisi kimi oyun göstərdi. Rəqibin hücumlarının qarşısını kəsməkdə öz funksiyasını yerinə yetirdi.
- Hakim Namiq Ələsgərova qarşı kobudluğu qeydə almadı...
- Epizod cərimə meydançasından kənarda idi. Həmin hücum haqda nəsə deməyə çətinlik çəkirəm. Ümumilikdə yaxşı oyun idarə etdi.
- Oyunun nəticəsini ədalətli hesab edirsinizmi?
- İlk hissədə bizim də hücumlarımız oldu. Əsas qələbə qazanmaq idi və bunu bacardıq. Qrupda ən güclü Almaniya yığmasıdır. Çalışacağıq ki, onlardan sonra ikinci pillədə qərarlaşaq.
- Belfastla Bakıdakı oyun arasında nə fərq var idi?
- Azərbaycan fərqli oyun nümayiş etdirdi. Belfastdakı qarşılaşmada daha az topla oynayırdı. Bilirdik ki, onlar fərqli oyun nümayiş etdirəcək.
- Hesab belə bitsəydi, nəticə sizi qane edəcəkdimi ?
- Xoşbəxtəm ki, qələbə qazandıq. Heç-heçə də bizə sərf edəcəkdi. Amma bu nəticə Dünya Çempionatında çıxmaq yolunda daha çox kömək edəcək.
- Hansı futbolçunu Azərbaycan millisində fərqləndirə bilərsiniz?
- Əsas komandanı qeyd etmək istəyərdim. Kapitanınız, Qara Qarayev, Şeydayev və əsas da Riçard Almeyda yaxşı oyun nümayiş etdirdi. Azərbaycan millisi bu heyyətlə daha yaxşı nəticələr əldə edəcək.