Newsport.az saytı günün transfer xəbərlərini təqdim edir:
Madrid "Atletiko"su "Çelsi"nin hücumçusu Dieqo Kostanın transferindən imtina edib. "Çelsi"də qalıb-qalmayacağı haqda son qərarını verməyən Kostanın əvəzinə Madrid klubu "Torino"nun hücumçusu Andrea Belottiyə göz dikib. "Hindular" Turin təmsilçisi ilə danışıqlara start verib. "Atletiko" İtaliya millisinin hücumçusu üçün 60 milyon avrosundan keçməyə hazırdır.
"Tottenhem" "Yuventus"un müdafiəçisi Dani Alveşlə maraqlanır. İngiltərə mətbuatında yer alan məlumata görə, braziliyalı sağ cinah müdafiəçisi yeni macəralar üçün İngiltərə gələ bilər. Üstəlik, London klubunda həmin mövqeydə çıxış edən Kayl Uolker komandadan ayrılacaq. Uolkerin xidmətində isə "Çelsi" və "Mançester Siti" maraqlıdır.
"Çelsi"nin çalışdırıcısı Antonie Konte çempion heyəti gücləndirmək üçün yayda komandaya 6 transferin edilməsini rəhbərlikdən tələb edib. İtaliya mütəxəssisin siyahısında Vircil van Dayk ("Sauthempton"), Marko Verratti (PSJ), Kayl Uolker ("Tottenhem") və Alvaro Moratanın ("Real") adları ilk sıradadır.
Pyer-Emerik Obameyanq yayda "Borussiya"dan ayrıla bilər. Qabonlu forvarda PSJ və "Mançester Yunayted" klublarında böyük maraq var. Obameyanqa Çinin "Tianjin Quanjian" klubundan da astronomik təklif gəlib.
"Bornmut" mövsümün sonunda "Çelsi"dən ayrılacaq Con Terriyə 2 illik müqavilə təklif edib.
"Talksport"un iddiasına görə, "Real"ın futbolçusu Qaret Beyl yayda İngiltərə qayıdacaq. Uelsli ulduzun xidmətində "Mançester Yunayted" maraqlıdır.
İspaniyanın "Real Betis" klubu "Mançester Siti"nin ispaniyalı hücumçusu Nolitonu icarəyə götürmək istəyir.
"Lion"un hücumçusu Aleksandr Lakazett İspaniyanın "Atletiko" və İngiltərənin "Arsenal" klbunun hədəfindədir. Onun bu yay komandadan ayrılacağı gözlənilir.
Adı bir çox Avropa nəhəngləri ilə hallanan Delle Alli növbəti mövsüm "Tottenhem"də qalacaq.
Çinin "Şanxay Şenhua" klubunun əsas transfer hədəfi "Çelsi"dən Dieqo Kostadır.
"Liverpul" Mamadu Sakonun transferi üçün "Kristal Pelas"dan 30 milyon avro tələb edir.
