Dünyanın bir çox ölkələrində olduğu kimi, Azərbaycan da bu gün Novruz bayramını qeyd edir.

Novruz yazın gəlişinin simvolu olan qədim xalq bayramıdır, mənası “Yeni gün”dür.

Novruz Şimal yarımkürəsində astronomik yazın başlandığı, gecə-gündüz bərabərliyi günündə (martın 20-si, 21-i və ya 22-də) keçirilir. Bir sıra xalqlar yaz fəslinin gəlməsini təbiətin canlanması ilə bağlayıb, bu münasibətlə şənliklər keçirib, onu yeni ilin başlanğıcı kimi bayram ediblər.

Qədim zamanlardan başlayaraq İran, Əfqanıstan, Tacikistan, Özbəkistan və bəzi başqa şərq xalqları ilə yanaşı, Azərbaycan türkləri də baharın - yeni ilin gəlişini şənliklərlə qarşılayırlar.

2009-cu il sentyabrın 30-da Novruz UNESCO tərəfindən qeyri-maddi mədəni irs siyahısına daxil edilib, 23 fevral 2010-cu ildə isə BMT martın 21-ni “Beynəlxalq Novruz Günü” elan edib.

Azərbaycanda da bu bayram böyük təntənə ilə qeyd olunur. Bu münasibətlə bütün ölkə ərazisində bayram tədbirləri keçirilir.

Qeyd edək ki, Azərbaycanda Novruz bayramı ilə əlaqədar martın 20-dən 28-dək qeyri-iş günləridir. Bahar Azərbaycana martın 21-də Bakı vaxtı ilə təxminən gecə saat 02:45-da qədəm qoyacaq.

Newsport.az saytı olaraq bu əziz bayram ərəfəsində hər bir azərbaycanlıya, onların ailələrinə səadət, firavanlıq, cansağlığı arzu edirik və uğurlar diləyirik! Qoy bu təravətli Novruz bayramı süfrənizi ruzu, qəlbinizi isə xoş hislərlə doldursun!

BAYRAMINIZ MÜBARƏK!