“Qarabağ”ın yarımmüdafiəçisi Leandro Andrade “Olimpiya” ilə oyundan sonra jurnalistlərin suallarını cavablandırıb.

- Müsahibəyə gec gəldiniz. "Qarabağ"a qol vuran həmyerliniz Kosta Pinto ilə nə danışırdınız?

- Pinto ilə “Sportinq”in aşağı yaş qruplarında eyni vaxtda çıxış etmişik. Uşaqlığımız birlikdə keçib. Hazırda ayrı-ayrı klublarda oynayırıq. İkimiz də ata olmağa hazırlaşırıq. Həyatımızın necə dəyişdiyi barədə danışdıq.

- "Qarabağ"da çıxış etməyi ona təklif etdiniz?

- Xeyr, tam əksinə, bizə qol vurduğu üçün ona çox əsəbiləşdim. (Gülür)

- Ardıcıl 10-cu mövsüm qruplarda oynayacaqsınız. Təəssüratlarınız necədir?

- İlk növbədə bu şərəfli tarixə töhfə verdiyim üçün çox xoşbəxtəm. "Qarabağ"ın tarixinin daha şanlı olması üçün əlimdə olan imkanlardan istifadə edəcəyəm.

- Hakim penalti epizoduna dərhal reaksiya vermədi. Bu hal sizi təəccübləndirdi?

- Epizodda mənə qarşı müdaxilə var idi. Belə epizodlarda penalti verilir. Amma hakimin qərarına təəccüblənmədim. Hadisələrin çox tez şəkildə cərəyan etməsi həmin epizodu gözdən qaçırması, hakimin VAR-a müraciət etməsi normaldır.

- Qrup mərhələsində hansı rəqiblə qarşılaşmaq istərdiniz?

- İngiltərə Premyera Liqası komandası ilə qarşılaşmaq xoş olardı. Burada qeyri-adi heç bir şey yoxdur. Bunu arzulayıram. Təbii ki, digər tərəfdən Portuqaliya komandası ilə oynamaq istərdim.

- Ölkə çempionatındakı vəziyyəti düzəldə biləcəksiniz? Hazırda "Zirə" 12 xalla liderdir...

- Dəyərlərimizə, özümüzə inanmalıyıq. Çempionatda "Zirə"yə qarşı 3 oyunumuz var. Hər şey özümüzdən asılıdır. İndiyə qədər itirdiyimiz xalları, etdiyimiz səhvləri təhlil edəcəyik. Yenidən liderliyi əldə etmək bizdən asılıdır. Bu, son deyil.